Siriiadan 4 balasymen oralǵan áieldiń lańkesterge qatysynyń bar-joǵy tekseriledi. Bul týraly búgin QR Bas prokýrorynyń orynbasary Andrei Lýkin aitty, dep habarlaidy QazAqparat.
Eske salaiyq, Astanada zań ǵylymynyń doktory, professor Qalaýsha Begalievtiń 90 jyldyq mereitoiyna arnalǵan halyqaralyq konferentsiia ótýde. BAQ ókilderi sharaǵa qatysqan QR Bas prokýrorynyń orynbasaryna sharadan tys birqatar suraq qoidy.
«Siriiadan 4 balasy bar áiel elge oralǵan bolatyn. Onyń terroristermen bailanysy bar-joǵyna tekserý júrip jatyr ma?», - dep surady tilshiler.
Osyǵan orai Andrei Lýkin ol áieldiń mindetti túrde tekserýden ótetindigin aitty.
«Bizdiń arnaiy qyzmetterimiz týyndaityn qaterdiń aldyn alý úshin sáikesinshe jumystar júrgizýdi kózdeidi. Sizderdiń saýaldaryńyzǵa jaýap berer bolsam, arnaiy qyzmetterimiz mindetti túrde olardyń janjaldar aimaǵyna, onyń ishinde Siriiaǵa ótýiniń shynaiy sebebin anyqtaý úshin sáikesinshe sharalar júrgizedi. Azamattarymyzdyń munan ary da soǵys oshaqtaryna ketýine jol bermeý mańyzdy máselelerdiń biri», - dedi ol.
Onyń aitýynsha, janjal aimaǵynda júrgen otandastarymyz elge oralýǵa niet bildirip, jazbasha ótinish jasaityn bolsa, onda memleket qoldan kelgen sharalar qabyldaityn bolady.
Esterińizge sala ketsek, 14 qarasha kúni QR Syrtqy ister ministrligi baspasóz qyzmetiniń jetekshisi Ánýar Jainaqov Siriianyń janjal aimaǵynan shyǵarylǵan Qazaqstan azamattary taiaý kúnderi elge jetkiziletindigin aitqan edi.
«Ózderińizde biletindei, keshe Sheshen Respýblikasynyń astanasy Groznyi qalasyna Siriiada janjal bolyp jatqan aimaqtan qutqarylǵan bir top adam jetkizildi. Olardyń arasynda Qazaqstan azamattary da boldy. Ol 1988 jyly dúniege kelgen Oral qalasynyń turǵyny men onyń kámelettik jasqa tolmaǵan 4 balasy. Olardy Groznyi áýejaiynda Qazaqstannyń Reseidegi Elshiliginiń qyzmetkerleri kútip aldy. Jaqyn arada olar Qazaqstanǵa jetkiziletin bolady», - degen edi ol.
