22 tamyz kúni Aqtóbe qalalyq №2 sotynyń sýdiasy Álima Ádilova Siriiadan oralǵan soń terrorizm kúdigine ilingen jergilikti turǵyn Aqmaral Almaǵambetovany bes jylǵa bas bostandyǵynan aiyrý týraly úkim shyǵardy.
Sot sheshimine sáikes, Almaǵambetova jazasyn qaýipsizdigi ortasha (jalpy rejimdegi) koloniiada óteitin bolady, dep habarlady Aqtóbe oblystyq sotynyń baspasóz qyzmeti.
Sottalýshynyń advokaty Nazgúl Dúisenbekovanyń Azattyqqa aitýynsha, úkim shyqqan kúni sot zalynda Aqmaral Almaǵambetovanyń týystary bolmaǵan. Úkim áli kúshine engen joq.
Qazaqstan biliginiń "Jýsan" arnaiy operatsiiasy aiasynda biyl kóktemde Siriiadan elge qaitarylǵan soń 32 jastaǵy Aqmaral Almaǵambetovaǵa tergeý oryndary "terrorizmdi nasihattady", "ulttyq alaýyzdyq týdyrdy" degen aiyptar taqqan edi. 22 shildede ótken alǵashqy sot otyrysynda Almaǵambetova ózine taǵylǵan aiyptardy tolyq moiyndap, protsestik kelisimge daiyn ekenin aitqan. Qylmystyń saralanýymen kelispegen sýdia 23 shildede Almaǵambetovanyń isin jańa protsestik kelisim jasaý úshin prokýratýraǵa qaitarǵan bolatyn.
Tergeý materialdary boiynsha, Aqmaral Almaǵambetova zańdy nekedegi kúieýinen 2013 jylǵy mamyr aiynda shariǵat jolymen ajyrasqan soń kóp uzamai úsh balasyn oǵan qaldyryp, shetelge ketken. 2014 jylǵy qańtarda Aqtóbede qalǵan kúieýine Siriiadan habarlasyp, qaqtyǵys aimaǵynda júrgenin aitqan. Keiin birneshe ret aýdio jáne jazbasha habarlama joldap, balalarynyń ákesine DAISh () ekstremistik uiymynyń "ideialaryn nasihattaǵan".
Tergeýdiń dereginshe, Aqmaral Almaǵambetova sońǵy alty jylda Siriiadaǵy birneshe qalany mekendegen. Sońǵy turaǵy osy eldiń soltústigindegi Kobani qalasynan kúrd jasaǵynyń kómegimen bosqyndar lagerine jetip, 2019 jylǵy 9 mamyrda "Jýsan" operatsiiasy aiasynda Qazaqstanǵa Siriiada 2015 jáne 2017 jyldary dúniege kelgen eki balasymen birge jetkizilgen.
Onyń eki balasy qazir memleket qaraýynda. Aqtóbede olar tárbielenip jatqan sábiler úiiniń aty-jónin ataǵysy kelmegen qyzmetkeri Azattyqqa balalardyń densaýlyǵy jaqsy ekenin aitty.
Biyl 7-9 mamyr aralyǵynda "Jýsan" arnaiy operatsiiasymen Siriiadan Qazaqstanǵa jetkizilgenderdiń ishinde Almaǵambetovadan bólek taǵy birneshe aqtóbeliktiń ústinen qylmystyq is qozǵalǵan. Olardyń biri - 30 jastaǵy Zarina Aqmalaeva "terrorizmdi nasihattaý", "dini alaýyzdyq qozdyrý" baptary boiynsha aiypty dep tanylyp, shildeniń sońynda sot úkimimen bes jylǵa bas bostandyǵynan aiyryldy. Zarina Aqmalaevanyń ózimen birge Qazaqstanǵa Siriiadan jetkizilgen kámeletke tolmaǵan eki balasy qazir naǵashy ájeleriniń tárbiesinde.
2018 shilde aiynda Qazaqstan ulttyq qaýipsizdik komiteti (UQK) Taiaý Shyǵysta soǵys bastalǵaly beri Siriia men Irakqa Qazaqstannyń 800-ge jýyq azamaty ketkeni týraly habarlaǵan. UQK málimetinshe, Siriia men Iraktaǵy halyqaralyq terrorlyq uiymdar qatarynda qazaqstandyq 120 er, 250-den astam áiel jáne kámeletke tolmaǵan 500 bala bolǵan.
2019 jyly Qazaqstan biligi "Jýsan" operatsiiasy barysynda Siriiadan elge 516 adamdy jetkizgen, olardyń 360-y - bala. Buǵan deiin bilik elge jańadan oralǵandardyń biraz ýaqyt ońaltý ortalyǵynda bolatynyn habarlaǵan.
