Resei syrtqy ister ministri Sergei Lavrov "Siriia beibit kúnge oralýda, el aýmaǵynda jekelegen shielenis oshaqtary ǵana saqtalyp otyr" dep málimdedi.
"Siriiadaǵy soǵys shynymen aiaqtaldy. El birtindep qalypty, beibit ómirge oralýda. Jekelegen shielenis oshaqtary Siriia úkimetiniń baqylaýynda emes, mysaly, Idlib jáne Evfrat ózeniniń shyǵys jaǵalaýynda ǵana saqtalyp otyr", - dep RIA Novosti Sergei Lavrovtyń sózinen úzindi keltirdi.
Ol qazirgi jaǵdaida birinshi kezekte Siriiaǵa gýmanitarlyq kómek kórsetý jáne "daǵdarysty sheshýge arnalǵan saiasi protsesti ilgeriletý" qajet ekenin atap ótti.
Ol Resei Siriia jaqtastarymen, onyń ishinde oppozitsiiamen turaqty bailanystardy qoldaýǵa erekshe nazar aýdaratynyn, sondai-aq Siriia qoǵamynyń barlyq tobyn saiasi protseske qatysýǵa shaqyratynyn málimdedi.
"Jalpy, Resei Siriianyń egemendigin, aýmaqtyq tutastyǵyn qalpyna keltirýdi, keń etek alǵan terrorizmniń zardaptaryn tez arada joiýdy, barlyq siriialyqtyń Otanyna jáne eldiń ózi "arab otbasyna" oralýyn qoldaidy, bul Taiaý Shyǵystaǵy qaýipsizdik pen turaqtylyqqa kepildik beredi", - dedi Lavrov.
Siriiadaǵy qarýly qaqtyǵys
Respýblikada soǵys 2011 jyldan beri jalǵasyp jatyr. 2015 jyldyń tamyzynda prezident Bashar Asad Reseiden áskeri kómek kórsetýdi surady. Sol jyldyń 30 qyrkúieginen bastap Resei áýe kúshteri terroristerdiń infraqurylymyna áýe shabýyldaryn jasady.
2017 jyldyń sońynda "Islam memleketi"* jeńilis tapqany jariialandy. Qazir saiasi retteý, eldi qalpyna keltirý jáne bosqyndardy oraltý basty nazarǵa alyndy.
* Qazaqstanda tyiym salynǵa terroristik uiym
