Qazaqstandyq jetekshi bilim ordasy ál-Farabi atyndaǵy Qazaq ulttyq ýniversiteti Siriia astanasy Damask qalasynan filialyn ashady. Bul bastama Almatyda Ábý Nasyr ál-Farabidiń 1150 jyldyǵy merekesin atap ótý saltanatynyń bastaý alýy barysynda aityldy, – dep habarlaidy ýniversitettiń baspasóz qyzmeti.
Mereitoilyq jyldyń resmi rásiminiń ashylýynda sóz alǵan QR Memlekettik hatshysy Qyrymbek Kósherbaev uly oishyldyń 1150 jyldyq mereitoiyn atap ótý aiasynda aýqymdy sharalar tek el kóleminde ǵana emes, shetelderde de josparlanǵanyn, sonyń ishinde Qazaqstannyń Damask qalasyndaǵy tarihi-mádeni ortalyǵy bazasynda QazUÝ filialyn ashý qarastyrylǵanyn jetkizdi.
Bul bastama QazUÝ rektory akademik Ǵalym Mutanovtyń ál-Farabi jylynyń saltanatty ashylýyna kelgen Damask Ýniversitetiniń prezidenti professor Mohammed Maher Kabakibimen kezdesýinde talqylandy
«Biz bul ideiany tolyqtai qoldaimyz jáne filialdyń qurylýyna, alǵa jyljýyna kómek beremiz. Bul halyqaralyq koloboratsiia úshin jaqsy úlgi bolady, Qazaqstan men Siriia ǵylymi-bilim berý salalarynda ekijaqty qarym-qatynasyn nyǵaityp, ál-Farabi muralaryna tereńnen zertteý júrgizýdi arttyrady», - deidi Damask ýniversitetiniń rektory.
