27 aqpanda Siriianyń soltústik-batysynda Bashar Asad áskeriniń shabýylynan 33 túrik sarbazy qaza tapty, 36 adam jaralandy. Bul aqparatty Túrkiianyń Hatai provintsiiasynyń gýbernatory habarlady.
Sarapshylar Siriiada soǵys bastalǵaly beri Túrkiia buryn-sońdy bir mezette osynshalyqty dárejede shyǵynǵa ushyramaǵan deidi. Beisenbi kúni Túrkiia prezidenti Rejep Erdoǵan Qaýipsizdik keńesiniń otyrysyn ótkizdi. Onda Asad áskerine "qarymta qaitarý" týraly sheshim qabyldanǵan.
"Biz halyqaralyq qaýymdastyqty ásirese Astana kelissózine qatysýshylardy mindettemelerin oryndap, Asad rejiminiń adamzatqa qarsy qylmysyn toqtatýǵa shaqyramyz" dedi Ankara ókili Fahrettin Altýn "Anadolý" agenttigine.
Siriia boiynsha Astana kelissózine qatysqandar arasynda Asadqa áskeri kómek berip otyrǵan Resei de bar. Al Túrkiia oppozitsiia kúshterin qoldaidy.
Keibir sarapshylardyń aitýynsha, Túrkiia Idlibtegi jaǵdaiǵa bailanysty Reseimen kikiljińnen ózin barynsha aýlaq ustaýǵa tyrysyp jatyr. Ankara ókiliniń aitýynsha, túrik sarbazdaryna Asad kúshteri shabýyl jasaǵan, biraq Idlibtegi aviareidterdiń basym bóligin reseilik áskeri aviatsiia jasaidy.
"Anadolý" agenttiginiń habarlaýynsha, aty-jónin aitpaǵan Túrkiia ókili reseilik telearnalardyń túrik sarbazdary Idlibtegi reseilik sarbazdarǵa oq atty degen tujyrymyn joqqa shyǵarǵan.
Túrkiia Idlibtegi jaǵdai boiynsha dereý kelisimge kelýge shaqyrdy. Erdoǵan Resei prezidenti Vladimir Pýtinmen naýryz aiynyń basynda kezdesýi múmkin ekenin habarlady. Alaida Kremldiń aitýynsha, Pýtin Siriiadaǵy jaǵdaidy Erdoǵanmen talqylaý úshin Stambýlǵa barýdy josparlap otyrǵan joq.
Túrkiianyń aqparat quraldarynyń jazýynsha, memleket basshysy Batys elderimen de keńesip jatyr.
AQSh senatory, respýblikashyl Lindsi Grem beisenbi kúni Idlibte ushaq ushýyna tyiym salatyn aimaq belgileýge shaqyrdy.
Siriiadaǵy soǵystyń kesirinen milliondaǵan adam úilerin tastap, bas saýǵalap qashqan. Olardyń basym bóligi Túrkiiadaǵy bosqyndar lagerinde turyp jatyr. Kóbi Eýropaǵa jetýdi kózdeidi.
Resei áskeriniń qoldaýymen Asad áskeriniń Siriia soltústigindegi oppozitsiia baqylaýyndaǵy aýdandarǵa shabýyl jasaýy bosqyndardyń jańa legin týdyrǵan.
BUU Idlibtegi beibit halyqqa qaýip tóngenin jáne gýmanitarlyq quqyqtyń buzylǵanyn málimdedi. Uiymnyń dereginshe, ótken jyldyń jeltoqsan aiynan beri provintsiiadan 950 myń adam ketken. BUU bosqyndar lagerin atqylaý, sonymen birge ondaǵy áielderdiń zorlyq-zombylyqqa ushyraýy siiaqty habarlamalar túskenin aitady.
