© Sputnik / Vladislav Vodnev
Nur-Sultanda ótip jatqan Siriiadaǵy jaǵdaidy retteý boiynsha Astana formatyndaǵy kezdesýler Qazaqstannyń kelissóz alańy retindegi bedelin arttyrady. Bul týraly Úkimet otyrysynan keiin jýrnalister saýalyna jaýap bergen vitse-premer – syrtqy ister ministri Muhtar Tileýberdi aitty, dep habarlaidy Sputnik Qazaqstan.
Jýrnalister Siriia boiynsha kelissóz ótkizý Qazaqstanǵa ne úshin qajettigin, onyń elimizge ne paidasy bar ekenin surady.
"Munyń arqasynda memleketimizdiń bedeli aitarlyqtai joǵary bolatyny sózsiz. Sondyqtan bir kezderi Qazaqstan BUU Qaýipsizdik keńesine sailandy. Óitkeni respýblika osyndai mediatorlyq máselelermen ainalysady", - dedi syrtqy ister ministri.
Onyń aitýynsha, Astana protsesindegi kepil elder men Siriiadaǵy qaqtyǵysqa qatysýshy taraptar kelissóz alańyn usynyp otyrǵan Qazaqstanǵa senim artady.
"Astana protsesi Jenevadaǵy protseske qosymsha retinde qarastyrylady. Jenevada aýqymdy konstitýtsiialyq jáne saiasi máseleler talqylanady, al Qazaqstanda tutqyndarmen almasý, arnaiy aimaqtardaǵy soǵys qimyldaryn toqtatý, dálizderdi ashý syndy máseleler qarastyrylady", - dep túsindirdi vedomstvo basshysy.
Eske salsaq, Siriia boiynsha kelissózder Qazaqstan astanasynda 2017 jyldyń qańtarynan beri ótip keledi.
Bir jarym jyl ishinde Astanada Siriia úkimeti, BUU jáne siriialyq qarýly oppozitsiia ókilderiniń qatysýymen toǵyz kezdesý ótti.
Resei, Túrkiia jáne Iran Astana protsesiniń kepil memleketteri rólin atqarady. Al Qazaqstan kelissóz alańyn usynady.
