Siriia áskeri Túrkiia áskeri operatsiiaǵa kirisken Siriianyń soltústigine qarai qozǵaldy. Siriiadaǵy resmi derekkózder Túrkiianyń áreketin "basqynshylyq" dep ataidy.
Sonymen bir ýaqytta Siriia úkimeti men "Siriia demokratiialyq kúshteri" (kúrdterdiń qarýly jasaqtary) arasynda kelissóz bastalǵany jaily habar tarady. Reuters málimetine qaraǵanda, kelissóz Resei áskeri baqylaityn Latakiiadaǵy Hmeimim aviabazasynda ótedi. Kelissózde qandai másele talqylanatyny ázirge belgisiz.
Qaqtyǵys aimaǵynda jumys istep júrgen CNN tilshileriniń aqparatyna qaraǵanda, Túrkiia áskeri Siriia aýmaǵyna kirgennen keiin oqiǵa tez óristep jatqanǵa uqsaidy.
AQSh qorǵanys ministri Mark Esper Túrkiia shabýyl aýqymyn bastapqyda aitylǵan mejeden keńeite túsi múmkin dep boljaidy. Bul týraly Bi-bi-si habarlady.
Túrik áskeri kúrd qarýly jasaqtaryn yǵystyrýdy kózdeidi. Bi-bi-si kúrd jasaqtaryn Siriia aýmaǵyndaǵy AQSh-tyń basty odaqtasy dep sanaidy. Esperdiń aitýynsha, kúrdter Siriia men Resei tarapynan qoldaý izdeýi múmkin, sol sebepti AQSh olardy qorǵaýǵa áreket jasamaidy.
BUU málimeti boiynsha, Siriianyń soltústiginde ótken aptada bastalǵan áskeri qimyldarǵa bailanysty 130 myńnan astam adam úiin tastap ketýge májbúr bolǵan jáne taiaý arada bosqyndar kúrt kóbeiýi múmkin.
Túrkiia áskeri 9 qazan kúni keshkisin Siriianyń soltústiginde áskeri operatsiia bastaǵan edi. Túrkiia prezidenti Rejep Taiyp Erdoǵannyń sózinshe, bul operatsiianyń maqsaty - "DAISh terrorlyq uiymymen jáne kúrdterdiń qarýly jasaqtarymen kúres".
