Qazaqstanda biyl qys sýyq bolady. Bul týraly búgin "Qazgidromet" ortalyǵynyń direktory Marina Shmidt málimdedi, dep habarlaidy Sputnik Qazaqstan.
Ortalyq kommýnikatsiialar qyzmetinde ótken brifingte belgili bolǵandai, qarasha aiynda aiazdy jáne jyly kúnder alma-kezek aýysyp, aýa raiy jaýyn-shashyndy bolady. Qatty jel soǵyp, túnde jáne kúndiz tuman túsip, kóktaiǵaq bolady dep boljanýda.
"Qarashanyń birinshi, ekinshi jáne úshinshi onkúndikteriniń ortasynda aiaz kádimgidei seziledi. Respýblikanyń soltústiginde aýa temperatýrasy túnde 10…20 gradýsqa deiin, kúndiz 5…10 gradýsqa deiin tómendeidi. Ońtústikte túnde 5…10 gradýsqa, kúndiz 0…5 gradýsqa deiin túsedi", — dep málimdedi Shmidt.
Ol uzaq merzimdi konsýltativtik boljamǵa sáikes (dáldigi 55-60%) biyl qys Qazaqstanda sýyq bolatynyn atap ótti. Jaýyn-shashyn mólsheri normaǵa sáikes kútiledi.
Jeltoqsan aiynda sýyq antiklonnyń jii enýine bailanysty aýanyń ortasha ailyq temperatýrasy klimattyq normadan 1°S tómen bolady jáne qar az jaýady dep boljanýda. Tek elimizdiń batysy men shyǵysynda temperatýralyq fon normaǵa jýyq bolady. Soltústik-shyǵys, ońtústik-batys, ońtústik oblystarynyń kei jerlerinde, sonymen qatar, ońtústik-shyǵys jáne shyǵys aimaqtardyń taýly aýdandarynda jaýatyn qardyń mólsheri normaǵa jýyqtaidy.
Qańtar aiynda el aýmaǵyndaǵy aýa raiyna Sibir antitsiklony áser etedi. Qazaqstannyń basym bóliginde qar az jaýady, aiaz bolady. Tek elimizdiń batysy men ońtústiginde qys aitarlyqtai jyly, al batysta, ońtústik jáne ońtústik-shyǵys oblystarynyń taýly aýdandarynda jaýatyn qardyń mólsheri normaǵa jýyq bolady dep boljanyp otyr.
Al aqpan aiynda sýyq aýa massalarynyń yǵysýynan ortasha ailyq temperatýra ortasha kópjyldyq mánnen 1…2 °S tómen bolmaq. Tek ońtústik-shyǵys aimaqtarda klimattyq normaǵa sáikes boljanýda. Jaýatyn qardyń mólsheri batys pen ontústik-shyǵys oblystarda, sonymen qatar ontústik jáne shyǵys aimaqtardyń taýly aýdandarynda normaǵa jýyqtaidy dep kútilýde.
Sinoptikterdiń boljamynsha, kóktemniń birinshi aiynda sýyq jáne jylymyq kúnderdiń alma-kezek aýysýyna bailanysty aýa raiy qubylmaly bolady. Ári jaýyn-shashyn kóp túsedi dep boljanyp otyr.
Ortasha ailyq temperatýra normadan 1°S joǵary, tek batys, ontústik jáne ontústik-shyǵys aimaqtarda normaǵa sáikes bolady.
