Foto: Yonhap
Ońtústik Koreiada ustalǵan qazaqstandyqtarǵa úsh túrli aiyp taǵyldy. Bul týraly Syrtqy ister ministrliginiń resmi ókili Aibek Smadiiarov aitty, dep habarlady Halyq Uni saity.
"Ózderińizge belgili, 24 naýryzda Inchhon áýejaiynda pasporttyq baqylaýdy ótý kezinde Tashkentten kelgen eki Qazaqstan azamatyna Ońtústik Koreia Respýblikasyna kirýge tyiym salyndy.
Olar deportatsiialaýdy kútý úshin arnaiy bólmege ornalastyrylǵan. Alaida túnde qazaqstandyqtar qashyp, Ońtústik Koreia aýmaǵyna zańsyz kirgen. 26 naýryzda zań buzǵan qazaqstandyqtyń biri ustaldy, al 29 naýryzda ekinshi azamat kinásin moiyndap, óz erkimen berildi", - dedi SIM resmi ókili.
Qazir zań buzǵan qazaqstandyqtar Inchhon qalasy kóshi-qon ortalyǵyndaǵy tergeý izoliatorynda qamaýda otyr.
Ońtústik Koreia zańnamasyna sáikes, tergeý sharalary úsh aiǵa deiin sozylýy múmkin. Is prokýratýraǵa jiberiledi. Osyǵan bailanysty tergeý múddesi úshin Ońtústik Koreianyń quzyretti organdary istiń egjei-tegjeiin ashpai otyr. Ustalǵan Qazaqstan azamattaryna Koreia Respýblikasynyń zańyn buzý boiynsha 3 aiyp taǵylady:
- Emigratsiialyq baqylaý týraly zańdy buzý, elge zańsyz kirý;
- Emigratsiialyq baqylaý týraly zańdy buzý, elde zańsyz bolý;
- Áýejai obektileri men onyń ǵimarattary týraly zańdy buzý.
Qazaqstannyń Ońtústik Koreiadaǵy elshiligi jergilikti quqyq qorǵaý organdary jáne ustalǵan qazaqstandyqtardyń týystarymen turaqty bailanysyp otyr.
Sondai-aq SIM resmi ókili Koreiadaǵy Qazaqstan azamattaryn jappai jumystan shyǵaryp jatyr degen málimettiń jalǵan ekenin atap ótti.
"Koreiada Qazaqstan azamattaryn jappai jumystan shyǵarylyp jatqany týraly aqparattyń shyndyqqa janaspaitynyn habarlaimyz. Bul oqiǵa resmi jumyspen qamtylǵan Qazaqstan azamattaryna áserin tigizbegen", - dedi ol.
Esterińizge sala keteiik, Koreiada jumys berýshi rásimdeitin arnaiy ruqsat pen vizanyń bolýy negizinde ǵana jumys isteýge bolady. Jumysqa turýdyń basqa joldary zańsyz bolyp esepteledi.
