Saýd Arabiiasyndaǵy mekteptiń baspaldaǵynan qulap, qaza tapqan 7 jasar qazaqstandyq 25 sáýir kúni týystarynyń ótinishimen Medinede jerlendi. Bul týraly QazAqparat Qazaqstan Syrtqy ister ministrliginiń baspasóz qyzmeti habarlady.
«2010 jyly dúniege kelgen qazaqstandyq mektepten úiine qaityp bara jatyp, baspaldaqtan qulap, qaza tapty. Balanyń ákesi, 1981 jylǵy Qazaqstan azamaty Medine islam ýniversitetinde bilim alýda», - dep habarlady QR SIM baspasóz qyzmetiniń basshysy Ánýar Jainaqov.
Týystarynyń ótinishimen balany Medinede jerledi.
«Qazaqstan konsýldyǵy Medine ákimshiligine Qazaqstan azamatyn jerleýge kómek kórsetý týraly ótinish jasap, resmi hat joldady. Balanyń ata-anasynyń mektepke eshqandai daýy joq», - dedi Ánýar Jainaqov. Eske salaiyq, Muhammed al-Kýshairi dini oqý ornynyń bastaýysh mektep oqýshysy Ahmed Nur baspaldaqtan qulap, basynan alǵan jaraqatynyń saldarynan kóz jumdy. Kameradaǵy videotaspaǵa muǵalimniń oqýshylarmen sóilesip turǵan kezinde oqýshynyń baspaldaqtyń taianyshyna shyǵyp, qulap ketken sáti túsip qalǵan.
Ǵalamtorda jariialanǵan bul kórinis qoldanýshylardyń ashý-yzasyn keltirdi. Olardyń aitýynsha, baspaldaq taianyshtary oqýshylardyń qaýipsizdigin qamtamasyz etý úshin jetkilikti dárejede biik emes.
Medine bas bilim berý basqarmasy qoldanýshylardyń synyna jaýap bere otyryp, Saýd Arabiiasynda osyndai úlgidegi ǵimarattardyń resmi túrde bekitilgendigin habarlady.
Mektepte qaiǵyly jaǵdaida qaza tapqan qazaq oqýshysynyń tergeýi týraly esep taiaý arada jariialanady, dep habarlady Medine bilim berý basqarmasy.
