Qazaqstan SIM basshysy Muhtar Tileýberdi Qazaqstannyń DHR men LHR-dy moiyndaýǵa qatysty ustanymyn aitty, - dep habarlaidy Tengrinews.kz tilshisi.
"Ózderińiz bilesizder, keshe Resei Prezidenti Donetsk pen Lýgansk halyq respýblikalaryn rastaý (moiyndaý - avt.esk.) jóninde sheshim qabyldady. Sondyqtan qazirgi jaǵdai kúrdeli, shielenisip bara jatyr. Al Qazaqstannyń resmi ustanymy qazir talqylanyp jatyr", - dedi ministr.
Ministrdiń aitýynsha, qazir LHR men DHR-dy taný týraly suraq turǵan joq.
"Mundai suraq turǵan joq. Eń birinshiden, biz halyqaralyq quqyq negizinde jáne BUU-nyń ustanymyn ustanamyz", - dedi Muhtar Tileýberdi.
Ol tilshilerdiń "beitaryptyqty saqtaisyzdar ǵoi" degen suraǵyna "árine" dep jaýap berdi.
Sondai-aq, Muhtar Tileýberdi jýrnalisterdiń "Pýtin ótinish bildirse, Qazaqstan UQShU-men Donbassqa óz áskerin jibere ma" degen suraǵyna jaýap berdi.
"Ujymdyq qaýipsizdik shart uiymy bar, Qazaqstan oǵan múshe memleket. Biraq bul uiymnyń ol jaqqa ásker jiberýge quqyǵy joq", - dedi
Eske salaiyq, buǵan deiin Qaýipsizdik keńesiniń kezekten tys úlken otyrysynan keiin Resei prezidenti Vladimir Pýtin el azamattaryna úndeý jasap, Lýgansk halyq respýblikasy men Donetsk halyq respýblikasynyń egemendigin dereý taný týraly sheshim qabyldaý qajet dep sanaitynyn málimdedi. Úndeýden keiin Pýtin birden Kremlde LHR men DHR-dy taný týraly Jarlyqtarǵa qol qoiǵan bolatyn.
