QR Syrtqy ister ministri Muhtar Tileýberdi Qairat Ábdirahmanovtyń Eýropadaǵy Qaýipsizdik jáne Yntymaqtastyq Uiymynyń Joǵarǵy komissary laýazymyna sailanýyna qatysty pikir bildirdi, dep habarlaidy QazAqparat.
«3-4 jeltoqsan kúnderi onlain formatta Eýropadaǵy Qaýipsizdik jáne Yntymaqtastyq Uiymynyń Syrtqy ister ministrleriniń 27-shi otyrysy bolyp ótti. Ol jiynda uiymǵa qatysýshy elder onyń mandatyna qatysty mańyzdy máselelerdi talqylady. Ózderińiz biletindei, 2020 jyl EQYU úshin ońai bolǵan joq. Sebebi keiingi jyldary bul uiym basshysyz jumys istep keldi. Atap aitqanda shildede tórt basshynyń bári birdei óz mandattarynan aiyrylǵan bolatyn. Biz bul kezeńge institýtsionaldyq daǵdarys retinde qaradyq. Búgin bul másele sheshimin taýyp, konsensýs ornap, jańa basshylar sailandy», - dedi Muhtar Tileýberdi SIM-niń baspasóz máslihatynda.
Onyń aitýynsha bul tarihi oqiǵa, óitkeni Venadan bastap Shyǵysqa qarai, iaǵni TMD men Ortalyq Aziiadaǵy elderdiń ishinen bul uiymnyń basshylyǵyna eshkim barmaǵan.
«Bul turǵyda Qazaqstan ulttyq azshylyqtar isteri jónindegi Joǵarǵy komissar laýazymyna tájiribeli qazaqstandyq diplomat, bizdiń eldiń Shvetsiia men Daniiadaǵy elshisi Qairat Qudaibergenuly Ábdirahmanovty usyný týraly sheshim qabyldady. Qairat Ábdirahmanovtyń usynylýyn EQYU-ǵa múshe memleketter jyly qabyldady. Osylaisha Qazaqstan bizdiń kandidatýra boiynsha úlken qoldaýǵa ie boldy», - dep atap ótti ministr.
Muhtar Tileýberdi qazaqstandyq úmitkerdiń bul orynǵa kelýin Qazaqstannyń álemdegi jáne uiymnyń óz ishindegi abyroiymen bailanystyrady.
«Qazaqstannyń ózi de bir ýaqytta atalmysh uiymǵa tóraǵalyq etip, bizdiń eldiń astanasynda sammit ótkizgen bolatyn», - deidi ol.
