Foto: QR SIM baspasóz qyzmeti
Qazaqstannyń Syrtqy ister ministrligi 15 sáýirden beri qarýly qaqtyǵys basylmai jatqan Sýdannan evakýatsiialanǵan el azamattarynyń sany týraly málimdedi, - dep habarlaidy Tengrinews.kz saity.
"Sýdandaǵy qarýly qaqtyǵystyń kúsheiýine bailanysty Mysyrdaǵy jáne Efiopiiadaǵy elshilikterimiz, sondai-aq Djiddadaǵy bas konsýldyq Qazaqstan azamattaryn evakýatsiialaý máselesimen ainalysyp jatyr.
Bastapqyda ol jaqtaǵy Qazaqstannyń úsh azamaty ǵana belgili bolǵan. Keiin aqparat BAQ-ta jariialanǵannan keiin Sýdan aýmaǵyndaǵy taǵy 14 azamatymyz ministrlikke júgindi", - dedi SIM baspasóz hatshysy Aibek Smadiiarov.
Syrtqy ister ministrliginiń habarlaýynsha, Qazaqstan elshilikteriniń esebine sáikes, qaqtyǵys órshigenge deiin Sýdanda barlyǵy 17 azamatymyz bolǵan.
"Olardyń kópshiligi Sýdanǵa jeke taý-ken kompaniiasynda jumys isteý úshin kelgen. Búginde Sýdanda ornalasqan Resei, Túrkiianyń Efiopiia, Iordaniia elshilikteriniń kómegimen, Qazaqstannyń alty azamaty evakýatsiialandy", - dedi resmi ókil.
Smadiiarov azamattardyń Iordaniia, Saýd Arabiiasy, Jidda jáne Efiopiiaǵa jetkizilgenin atap ótti.
"IýNISEF qyzmetkeri bolyp tabylatyn Qazaqstannyń bir azamaty Iordaniiadaǵy IýNISEF kampýsyna ornalastyryldy, taǵy bir otandasymyz óz ótinishi boiynsha Ámirlikterde qalýdy uiǵardy. Tórt otandasymyz Qazaqstanǵa keldi. 17 azamattyń altaýy Sýdannan tys jerlerge ketti. Bizdiń qalǵan 11 azamat óz qalaýy boiynsha Sýdanda qaldy. Onyń 10-y - taý-ken óndirýshi jeke kompaniianyń qyzmetkerleri. Bir azamat - "Shekarasyz dárigerler" uiymynyń qyzmetkeri. Ol sonda qalýdy sheshti, biz de onymen bailanystamyz", - dedi Smadiiarov.
Syrtqy ister ministrliginiń ókili Sýdanda Qazaqstannyń elshiligi bolmaǵandyqtan, azamattardy evakýatsiialaý sheteldik elshilikterdiń kómegimen júzege asyrylatynyn atap ótti.
