Foto: Shutterstock
Halyq ókilderinen quralǵan búkilqytailyq jiyn depýtattary Si Tszinpindi Qytai tóraǵasy etip úshinshi merzimge qaita sailady. Bul týraly "Sinhýa" agenttigi habarlady.
Si Tszinpin – memleket basshysy retinde úshinshi merzimge sailanǵan alǵashqy basshy.
"Kommersanttyń" jazýynsha, Si myrza Qytai ortalyq áskeri keńesiniń jetekshisi qyzmetin de saqtap qalǵan. Buǵan qosa, memlekettik keńestiń birinshi orynbasary Han Chjen Qytai tóraǵasynyń orynbasary retinde sailanǵany belgili boldy. Odan bólek, Qytai kompartiiasy saiasi biýrosy komitetiniń turaqty múshesi Chjao Letszi búkilqytailyq jiyn depýtattary turaqty komitetiniń tóraǵasy bolyp taǵaiyndalǵan.
Daýys berý búkilqytailyq jiyn depýtattarynyń alǵashqy sessiiasynyń úshinshi jalpy otyrysynda bolǵan. Onyń aldynda depýtattar Qytai memlekettik keńesi apparatynyń reforma josparyn maquldaǵan.
Memlekettik keńes – Qytaidyń joǵarǵy atqarý organy. Reforma josparynyń sońǵy nusqasy jariialanǵan joq. Ol "ortalyqtanǵan bilikti" kúsheitip, "memlekettik apparattyń tiimdiligin arttyrýǵa tiis" dep aitylady.
Si Tszinpin 69 jasta. Ol 2012 jyly Qytai kompartiiasy ortalyq komitetiniń bas hatshysy bolǵan. 2013 jáne 2018 jyldary Qytai tóraǵasy bolyp sailandy. 2017 jáne 2022 jyldary kompartiia ortalyq komitetiniń bas hatshysy qyzmetine qaita sailandy.
Aita keteiik, aqpanda Qytai basshysy Si Tszinpin Máskeýge baratyny habarlandy. Bul QHR tóraǵasynyń RF áskeri Ýkrainaǵa basyp kirgennen keiingi Reseige alǵashqy sapary bolmaq. Aqparatqa qaraǵanda, Pekin Kremldi Ýkrainada iadrolyq qarý qoldanbaýǵa kóndirýge tyrysady.
25 aqpanda CNN jáne The Wall Street Journal basylymdary Amerika barlaý qyzmetine súiene otyryp, Qytai Reseige drondar, artilleriia men oq-dári tasymaldaýdy qarastyryp otyr dep jazǵan. Buǵan deiin Pekin Máskeýge qarý-jaraq berý jospary joǵyn aitqan.
