Foto: RIA Novosti
Reseidiń burynǵy prezidenti, Qaýipsizdik keńesi tóraǵasynyń orynbasary Dmitrii Medvedev Pekinde Qytai basshysy Si Tszinpinmen kezdesti. Bul jóninde reseilik saiasatker Telegram-arnasynda habarlady, dep jazady Azattyq.
Medvedev Si Tszinpindi Qytai kompartiiasynyń bas hatshysy qyzmetine qaita sailanýymen quttyqtaǵan. Sonymen birge kelissóz kezinde "Edinaia Rossiia" jáne Qytai kompartiiasy arasyndaǵy ózara qarym-qatynas, Máskeý men Pekin arasynda túrli saladaǵy áriptestik, halyqaralyq máselelerdi talqylanǵan. Medvedevtiń sózinshe, ol Si Tszinpinmen Ýkraina máselesin de sóz etken. Reseilik saiasatker kelissózdiń "paidaly" ótkenin atap ótken.
Biyl qarashada Si Tszinpin Qytai kommýnistik partiiasynyń 20-sezinde partiianyń bas hatshysy bolyp qaita sailandy. Si Tszinpin bul qyzmetke úshinshi merzimge sailanyp otyr. Den Siaopin kezeńinen beri Qytaida saiasatkerler partiia jetekshisi qyzmetinde tek eki merzim ǵana bola alatyn. 2018 jyly bul shekteý Si Tszinpinniń bastamasymen alynyp tastaldy.
Resei Ýkrainaǵa basyp kirgeli beri Medvedev qatań málimdemeler jasap, Batysqa qoqan-loqy da kórsetken. Ol málimdemelerinde Apokalipsis, Armageddon uǵymdaryn jii paidalanyp, Reseidiń iadrolyq qarý qoldanýy múmkin ekenin birneshe ret meńzegen.
Sarapshylar Qytai Ýkrainadaǵy soǵysqa bailanysty málimdemeler jasaǵanda asa saqtyq tanytatynyn aitady: BUU-da Reseidiń Ýkrainaǵa basqynshylyǵyn aiyptaityn rezoliýtsiia qabyldanǵan kezde Pekin Reseidi qoldamaǵan, biraq basqynshylyqty ashyq aiyptaǵan da joq.
