Kezdesýde aimaqtyq qaýipsizdikti qamtamasyz etý, saýda-ekonomikalyq jáne mádeni-gýmanitarlyq bailanystardy nyǵaitý siiaqty basym baǵyttar boiynsha Qazaqstannyń Shanhai yntymaqtastyq uiymymen aradaǵy yqpaldastyǵyna qatysty máseleler talqylandy. Sondai-aq, qazirgi geosaiasi jaǵdaidaǵy Uiym qyzmetiniń negizgi aspektileri qarastyryldy.
Qasym-Jomart Toqaev Chjan Minge iltipat bildire otyryp, onyń ShYU-nyń bas hatshysy qyzmetine geosaiasi ahýaldyń kúrdeli jaǵdaiynda, iaǵni Uiymnyń erekshe ról atqaratyn kezinde kiriskenin atap ótti.
"Qazaqstan - Shanhai yntymaqtastyq uiymynyń belsendi múshesi. ShYU-nyń Bishkekte ótken sammitinde sóilegen sózimde onyń halyqaralyq arenadaǵy uiymdardyń ishindegi eń tabystysy ekenin atap óttim", - dedi Qazaqstan Prezidenti.
Sonymen qatar, Memleket basshysy ShYU-nyń keń aýqymdy problemalardy qamtityn kún tártibiniń biregeiligine basa mán berdi.
"ShYU, shyn máninde, qaishylyq týǵyzatyn uiym emes. Onyń qyzmeti konstrýktivtilikke, múshe memleketter arasyndaǵy yntymaqtastyqty damytýǵa baǵyttalǵan. Sonymen qatar, bul Uiym halyqaralyq jaǵdaidy jaqsartýǵa zor úles qosýdy kózdeidi. Sondyqtan Qazaqstan ShYU-nyń jumysyna belsendi qatysa beredi jáne onyń áleýetin nyǵaitýǵa óziniń eleýli úlesin qosady", - dedi Qazaqstan kóshbasshysy.
Memleket basshysy elimizdegi aldaǵy jalpyulttyq referendýmǵa baiqaýshylar missiiasyn uiymdastyrǵany úshin ShYU-nyń Bas hatshysyna rizashylyǵyn bildirdi.
Óz kezeginde Chjan Min ShYU-ǵa múshe basqa da memleketterdiń kóshbasshylarymen birge ózin Uiymnyń Bas hatshysy laýazymyna taǵaiyndaý týraly sheshim qabyldaý kezinde senim bildirip, qoldaý kórsetkeni úshin Qasym-Jomart Toqaevqa alǵys aitty. Ol Prezidentke Uiymnyń áleýetin jáne múshe memlekettermen aradaǵy yntymaqtastyqty odan ári nyǵaitý úshin bar kúshin salatynyn jetkizdi.
Diplomat Qazaqstannyń áleýmettik-ekonomikalyq damý jolyndaǵy jetistikterin, Prezidenttiń basshylyǵymen iske asyrylyp jatqan aýqymdy reformalardy joǵary baǵalady. Chjan Min Uiymnyń áleýetin arttyrýǵa elimizdiń qosqan eleýli úlesin jáne ony damytýǵa belsendi atsalysatynyn aitty.
Áńgimelesý barysynda Uiymnyń Bas hatshysy Prezidentke qyrkúiek aiynda Samarqandta ótetin Shanhai yntymaqtastyq uiymyna múshe memleketter basshylary keńesiniń kezekti otyrysyna daiyndyq barysy týraly málimet berdi.
Sonymen qatar, Qasym-Jomart Toqaev pen Chjan Min halyqaralyq kún tártibindegi ózekti máseleler jóninde pikir almasty.
