Ortalyq kommýnikatsiialar qyzmetinde ótken brifingide Shymkent qalasy ákiminiń birinshi orynbasary Shyńǵys Muqan qala turǵyndary arasynda koronavirýs pnevmoniiasymen aýyrǵandardyń nege kóp ekenin túsindirdi, dep habarlaidy QazAqparat.
«KVI+» pen «KVI-»-ti statsionarǵa barǵan boida PTR-test arqyly anyqtaidy. Onyń ústine kompiýterlik tomografiiadan ótedi. Ókinishke qarai, koronavirýs infektsiiasy juqqan boida emdi bastap ketpese, onyń ári qarai pnevmoniiaǵa ainalý qaýpi óte joǵary. Sondyqtan, bizde Shymkent qalasynda ózdiginen emdelgen adamdar boldy. Sol ýaqytta jyldam sheshim qabyldap, dárihanalardyń janyndaǵy jeke menshik túrli ekpe qabyldaý oryndarynyń jumysyn rettedik. Naýqastardyń bárinen virýs belgilerin baiqaǵan boida habarlasýdy ótindik. Sondyqtan, osyndai jaǵdai oryn aldy dep oilaimyn», - degen ákimdik ókili turǵyndardyń jeke praktikadaǵy dárigerlerdiń kómegine kóp júginýi jaǵdaidy ýshyqtyrǵanyn atady.
«Turǵyndardyń ózderi emhanaǵa barmai, ózdiginen emdelý saldarynan syrqaty koronaviýrs pnevmoniiasyna ainalyp ketken jaǵdailar boldy. Ókinishke qarai, bizde aýyr jaǵdaimen túsken naýqastardyń kóbi on besinshi, on altynshy, tipti jiyrmasynshy kúni biraq meditsina kómegine júginedi. Olar osyndai jeke praktikadaǵy dárigerlerden dári-dármek alyp, bir emes, eki kýrs em qabyldaǵan. Onyń ishinde aýyr-aýyr antibiotikter bar. Sonymen emdelip, túk bolmaǵan soń jedel járdemge habarlasyp, aýyr kúide túsip jatqan naýqastar boldy. Sondyqtan bul jaǵdai qaitalanbas úshin aldaǵy ýaqytta densaýlyq saqtaý salasynda meditsinalyq aǵartý jumystaryn kúsheitýimiz kerek», - dedi Shyńǵys Muqan.
