Premer– ministrdiń qabyldaý bólmesinde úsheý otyr: Jaǵympaz, Ótirikshi, Shyndyq. Jaǵympaz jyly jymiyp qoiady. Qabyldaýǵa qalaida kiretinine senimdi. Kómekshiniń kóleńkesin qushaqtady, týfliin súrtip berdi, iyǵyna qonǵan masany ushyrdy...
Úkimet basshysy aldynda ne másele kóteretinin de bilmeidi. Bar biletini– jymiia berý. Kózderin jypylyqtatý, múláiimsý... Taǵy ne qaldy ózi? Basqa eshteńe bilmeidi. Kofe pisirim ýaqytta Jaǵympaz úkimet qabyldaýynda bolyp, bir saǵat degende áreń shyqty.
Ótirikshi sheneýnik te ózine senimdi. «Biz baqytty elmiz! Elde qaiyrshylardy itpen izdep taba almaisyń, kedeiler joq, halyq shetinen baiyp ketken, keibiri kedei bolýǵa niettense de, qoldarynan kelmei jatyr. Jemqorlyqtyń tamyrynan qan shyǵyp ketken. Jer satylyp jatqan joq. Biz baqyttymyz! Salyqtyń san alýan túrleri kelse de, eldiń eńsesi túsken joq,»–dep ótiriktiń órigin jeitin bolady. Áne, ol da úkimet basshysynan máz bolyp shyqty.
Shyndyq premerge kire almady. Oǵan biliktegi «bilep» júrgender: «Bizdiń elde shyndyq joq!» –deisiz ózińiz... Siz joqsyz. Joq bola turyp, qalai kiresiz? Aldymen «bar» bolyp kelińiz»,– dep shyǵaryp saldy. Shyndyqtyń aitary kóp edi! Áne, Shyndyqtyń shliapasyn shań basyp, eńsesi ezilip bara jatty...
Muhtar Sherim. Búgingi satira.
