Banknottardyń qorǵanys elementteri týraly Ulttyq banktiń Qolma-qol aqsha ainalysy departamentiniń banknottar men monetalar saraptama basqarmasynyń bastyǵy Ashat Ábishev túsinikteme berdi, dep habarlaidy QazAqparat.
Shyn banknotty jalǵan banknottan ajyratý úshin olardyń túpnusqalyǵynyń birneshe belgilerin bilý jetkilikti. Elimizdegi jalǵan banknottardyń negizgi bóligi túpnusqalyqtyń keibir belgilerin ǵana imitatsiialaityn jeńildetilgen tehnologiia boiynsha shyǵarylady.
Ashat Ábishevtiń aitýynsha, mundai qoldan jasalǵan banknotty arnaiy jabdyqtyń kómeginsiz-aq «sezin – qara – aýdaryp kór» ádisin qoldaný arqyly anyqtaýǵa bolady.
«Aldymen banknotty ustap seziný qajet. Banknot qaǵazy erekshe shytyrlaidy. Barlyq banknottarda beder beretin arnaiy mór basylǵan. Eger «QAZAQSTAN ULTTYQ BANKI» degen ataýy nemese arhitektýralyq beineler, Qazaqstannyń kartasy boiynsha saýsaqpen júrgizip kórse bederdi sezýge bolady.
Sonymen qatar, barlyq banknottarda kózi nashar kóretin adamdarǵa arnalǵan belgiler bar, olar banknottyń tómengi bóliginde ornalasqan. Bular – ustap kórgende jaqsy ajyratýǵa bolatyn joǵary bederli elementter.
Ekinshiden banknotqa muqiiat qaraý qajet.
Bastapqyda aqsha belgisiniń taza, aiqyn, kontrastty nemese las bolýyn, daqtarynyń bolýyn jalpy kózben kórip zerdeleý qajet. Banknotty jaryqqa qaratyp, ańyzdaǵy «Samuryq» qusy túrindegi sý belgisin jáne nominaldyń sandyq beinesin kórýge bolady.
Dál osy siiaqty, jazýlary bar núktelik syzyqtar túrinde qaǵaz betinde paida bolatyn magnitti (metaldandyrylǵan) úzik jipti tekserý qajet. Ol birtutas bolýy kerek.
Úshinshiden,banknotty aýdaryp kórý kerek.
1000 teńgeden 20 000 teńgege deiingi banknottarda banknottyń kólbeý buryshyna qarai túsin jasyldan altynǵa tústeske ózgertetin erekshe element bar. Banknotty ár túrli buryshtarda baiaý burǵan kezde element boiymen tústi jolaqtyń qozǵalysyn kórýge bolady.
2000 jáne 5000 teńgelik banknottardyń syrt jaǵynda golografiialyq jolaq bar. Gologrammadaǵy sýretter jarqyraidy jáne dinamikalyq áser etedi.
Bul úsh ádis sizge banknottyń shynaiylyǵyn arnaiy jabdyqsyz anyqtaýǵa kómektesedi», - deidi banknottar men monetalar saraptama basqarmasynyń bastyǵy.
