Shymkent qalasynyń jańa ákimi Erlan Aitahanov alǵashqy jumys saparyn qalanyń shetinde ornalasqan shaǵyn aýdandardyń turǵyndarymen kezdesýden bastady, dep habarlady Shymkent qalasy ákiminiń baspasóz qyzmeti.
Ákim Qarataý aýdanynyń Isfidjab turǵyn alabyna arnaiy kelip, aýyz sý jáne elektr qýatymen qamtý máselesin turǵyndarmen birge talqylady. Qala basshysy aýyz sý máselesin júieli túrde sheshý boiynsha sala basshylaryna naqty tapsyrmalar berdi.
"E.Aitahanov sapar barysynda Sairam turǵyn alabyna baryp, ondaǵy infraqurylym júiesimen tanysty. Budan bólek, qala ákimi jergilikti halyqpen kezdesip, eki saǵattan astam ýaqyt turǵyndarmen ózekti máselelerdi talqylady", - dep jazylǵan habarlamada.
Turǵyndardy tolǵandyryp otyrǵan basty másele aýyz sý men sapaly elektr energiiasy bolyp otyr.
Kezdesý barysynda qala basshysy negizgi jumys halyqtyń ómir sapasy men ál-aýqatyn arttyrýǵa baǵyttalatynyn aityp, kóterilgen máselelerdi ret-retimen sheshý mindeti turǵanyn jetkizdi.
"Ózderińizge málim, Shymkent qalasynyń áleýmettik-ekonomikalyq damýyna memleket basshysy Qasym-Jomart Toqaevtyń ózi airyqsha nazar aýdaryp otyr. Halyqtyń turmysyn jaqsartý boiynsha naqty tapsyrmalar berdi. Meniń basty maqsatym –shalǵaida ornalasqan eldi mekenderdiń turǵyndaryna qolaily jaǵdai jasaý", - dedi E.Aitahanov.
Iaǵni, qala basshysy Shymkentti megapolis mártebesine laiyqty etý úshin shalǵaidaǵy shaǵyn aýdandardyń infraqurylymyn damytýdy birinshi orynǵa qoiyp otyr. Osylaisha ol halyq pen bilik arasyn jaqyndatý nietin jetkizdi.
