video kadry
Shymkenttegi Shymsiti shaǵynaýdanyndaǵy 9 qabatty úidiń qoldanysqa berilgenine 4 jyl ǵana bolǵan. Sodan beri memlekettik baǵdarlamamen salynǵan baspananyń máselesi biter emes. Alǵashynda jańbyr jaýyp, kún sýysa, úidiń terezesi men tóbesinen sý sorǵalaǵan. Turǵyndardyń sózinshe, odan keiin aqaý qubyrlarda paida bolyp, jurt shash-etekten shyǵynǵa batqan. Alaida 7-20-25 baǵdarlamasymen salynǵan úidiń bylyǵy jer silkinisinen keiin jurtty tipti ábigerge túsirgen, - dep habarlaidy Tengrinews.kz saity KTK telearnasyna silteme jasap.
"Jer silkingen kúni úidegi esik terezeniń barlyǵy syqyrlap, janymyzdy qoiarǵa jer tappai kettik. Aldy-artymyzǵa qaramai qashtyq. Kelsek, úidegi qabyrǵalar qaqyraǵan. Bul úiler bar bolǵany 3 baldyq jer dúmpýine shydamasa, 4 ball bolsa, qulaityn shyǵar. Qazir kórshilerdiń kóbi basqa jaqqa kóship ketti. Al eshkimi joqtar osylai úreimen kún ótkizip júrmiz", - deidi Shymkent turǵyny Sholpan Qurtanova.
9 qabatty úide turatyn 100-ge jýyq otbasy baspanalaryn 15 jylǵa nesiege alǵan. Eń kemi aiyna 120 myń teńgeden tóleidi, biraq narazylyq bildirgen jurt turǵyn úidiń taǵy 10 jylǵa shydaitynyna kúmánmen qarap otyr.
"Úiimiz qaǵazdan soǵylǵandai qulap jatyr. Kepildik merzimi bitpei byt-shyty shyǵyp jatqan páterler budan árige shydaitynyna kúmánmen qaraimyz. Túrkiiadaǵydai zilzala bolsa, bizdiń dymymyz qalmaidy. Tipti 4 baldyń ózine shashylyp qalaiyn dep turmyz ǵoi", - deidi úi turǵyny Quralai Saǵyndyqova.
Al ákimdik ókilderi "ýaiymdaityn eshteńe joq" deidi. Sózderinshe, bul qalypty jaǵdai jáne jarylǵan jerdi jamaimyz dep jurtty jubatyp qoidy.
"Joq, bul úi 8 balǵa qirap qalmaidy. Sebebi qańqasy monolit. Tóbesinde monolitke túiisken jerinde zazor bolady. Ol zazor arnaiy kópirshikpen jabylǵan. Sol arnaiy jer silkingen kezde oinap turady. Bul qulamaý úshin jasalatyn dúnie", - deidi Shymkent qurylys basqarmasy basshysynyń orynbasary Erdáýlet Ájibaev.
Memlekettik baǵdarlamamen berilgen kópqabatty úilerdiń kepildik merzimi 3 aidan soń aiaqtalady.
