Himiialyq kastratsiia jasaýǵa úkim etilgen 30 jastaǵy Shymkent qalasynyń turǵyny jazasyn ótep shyqty, dep xabarlaidy Sputnik.
Tóle bi aýdandyq sotynyń sýdiasy Nurmaxan Jorabekovtyń aitýynsha, sot 2018 jyldyń sáýir aiynda 1989 jyly týǵan Shymkent qalasynyń turǵynyna ximiialyq kastratsiia jasaý týraly usynysty qanaǵattandyrǵan. Sottalýshy 2008 jyly shilde aiynda 4 jastaǵy qyzdy zorlady degen aiyppen Qylmystyq Kodekstiń 120-babymen ("Zorlaý") 10 jylǵa sottalǵan. Jazasyn Lenger qalasyndaǵy ICh-167/9 túzeý mekemesinde ótep jatqan.
"Aýdandyq sot jazasyn óteýshige psixiatriialyq saraptama taǵaiyndady. Saraptama oǵan ximiialyq kastratsiia jasaýǵa bolatyny jóninde qorytyndy bergennen soń sot túzeý mekemesiniń usynysyn qanaǵattandyrdy", - deidi Nurmaxan Jorabekov.
Sottyń sheshimine aýdandyq prokýratýra qarsylyq bildirip, narazylyq tanytqan.
"Óitkeni jazasyn óteýshi 1997 jyly shyqqan Qylmystyq kodekspen sottalǵan. Al ximiialyq kastratsiia jasaý týraly zań alǵash ret 2015 jyly bekitilgen. Jańa zań eski zańmen sottalǵandarǵa qoldanylmaitynyn eskerip, 2018 jyldyń qazan aiynda oblystyq sot aýdandyq sot qaýlysynyń kúshin joidy", - dep túsindirdi sýdia.
Sýdia ximiialyq kastratsiia jasalmai qalǵan sottalýshy qazir jazasyn ótep shyqqanyn, Shymkent qalasynda turatynyn aitady. Oblystyq sottyń qaýlysyna eshkim shaǵym túsirmegen.
Himiialyq kastratsiia qoldaný jónindegi zań 2018 jyldyń 1 qańtarynan kúshine endi.
