Shymkenttik qylmys áleminiń serkesi delingen Rafael Bikbaev Reseide ustaldy, - dep habarlaidy "Ult aqparat" QR IIM baspasóz qyzmetine silteme jasap.
"Ońtústik Qazaqstan oblystyq IID Uiymdasqan qylmystyq toppen kúres jónindegi bólimshe qyzmetkerleri 2016 jyldyń qazan aiynan beri buǵan deiin esirtki zattarynyń zańsyz ainalymy úshin birneshe ret sotty bolǵan qylmys áleminiń "avtoriteti" Rafael Bikbaevtyń basshylyq etken qylmystyq tobyn belsendi túrde tekserdi", - dep habarlady vedomstvonyń baspasóz qyzmeti.
Bikbaev basqarǵan uiymdasqan qylmystyq top Ońtústik Qazaqstan oblysy territoriiasynda bopsalaýmen jáne reiderlikpen ainalysqan delinedi.
"Biyl naýryzda politsiia qyzmetkerleri Ońtústik Koreianyń jábirlenýshi azamatyn anyqtady, ol 2014 jyly shikizat óńdeý fabrikasyn salyp, kásipkerlik qyzmetpen ainalysqan. Bikbaevtyń qylmystyq toby qorqytý, bopsalaý jáne shantaj arqyly fabrikany óz músheleriniń biriniń atyna jazdyryp alǵan", - delingen habarlamada.
Al maýsym aiynyń sońynda Shymkent qalalyq jedel toptary qylmystyq toptyń 9 múshesin bir ýaqytta ustaǵan. Olar óz kezeginde qylmysyn moiyndap, Bikbaevqa qatysty Koreia azamatynyń fabrikasyn zańsyz alyp qoiý deregi boiynsha kýálik bergen.
2 tamyzda Bikbaevqa memleketaralyq izdeý jariialanǵan.
Munymen qatar, Bikbaevtyń top bolyp, zorlyq kórsetý, buzaqylyq jasaý jolymen birneshe ret bopsalaý qylmysyna qatysy bar anyqtalǵany aitylady.
Al 16 qyrkúiekte QR men Resei IIM qyzmetkerleri jedel izdestirý sharalarynyń barysynda Rafael Bikbaevty Máskeý oblysyndaǵy Ramenskii aýdanynda Qyrǵyz Respýblikasynyń azamaty ekendigin anyqtaityn jalǵan pasportpen ustaǵan.
Vedomstvo málimetinshe, qazirgi ýaqytta Bikbaevty Qazaqstanǵa ekstraditsiialaý máselesi sheshilip jatyr.
