Shymkenttik kásipker agroónerkásiptik keshenge sýbsidiia alý kezinde memleketti iri somaǵa aldaǵany belgili boldy. Alaiaqtyqty qalalyq prokýratýra qyzmetkerleri anyqtady, dep habarlaidy "Ult aqparat" Otyrar.kz portalyna silteme jasap.
Is materialdary boiynsha, kásipker sút ónimderiniń qunyn tómendetý boiynsha durys emes ótinimder usynǵan. Memleketke keltirilgen zalal 12 million teńgege baǵalanady. Is qazir sotta qaralýda.
"Óndirýshi sút ónimderin óńdeitin kásiporyndarǵa sút satýy kerek edi. Kásiporyndar qalalyq prokýratýraǵa bergen aqparatqa sáikes, olar óndirýshiden eshqandai ónim almaǵany belgili boldy. Memleketten sýbsidiia taýarlardyń baǵasyn tómendetýge baǵyttalǵan jáne litrine 20 teńgeden tólenedi", – deidi Shymkent qalasy prokýratýrasynyń aǵa prokýrory Qali Beisenbaev.
Qala prokýratýrasy aýyl sharýashylyǵy taýaryn óndirýshige qatysty 12 mln teńgeni jymqyrý faktisi boiynsha Qazaqstan Respýblikasy Qylmystyq kodeksiniń 190-babynyń 3-bóligi (iri kólemdegi alaiaqtyq) boiynsha qylmystyq is qozǵap, sotqa joldady.
Dál osylai sýbsidiia alýǵa negizsiz tyrysqan birneshe kásipkerler anyqtaldy. Memleket kirisine 24 million teńge óndirildi. Sonymen qatar, óreskel zań buzýshylyqtar úshin sheneýnikter de jaýapkershilikke tartyldy.
"Prokýrorlyq qadaǵalaý aktisi boiynsha Shymkent aýyl sharýashylyǵy jáne veterinariia basqarmasynyń 6 laýazymdy adamy, onyń ishinde basqarma basshysynyń orynbasary tártiptik jaýapkershilikke tartyldy", – deidi Shymkent qalasy prokýratýrasynyń aǵa prokýrory Qali Beisenbaev.
