Shymkent qalasynyń № 2 arnaýly áleýmettik qyzmetter kórsetý ortalyǵynda kóptegen buzýshylyqtar anyqtaldy, dep habarlaidy "Ult aqparat".
QR Eńbek jáne halyqty áleýmettik qorǵaý ministrliginiń bastamasy boiynsha monitoring toby júrgizgen jospardan tys tekserý barysynda Shymkent qalasynyń № 2 arnaýly áleýmettik qyzmetter kórsetý ortalyǵynda qyzmet alýshylardyń quqyǵyn buzýdyń kóptegen faktileri anyqtaldy.
Tekserý nátijesi QR Eńbek jáne halyqty áleýmettik qorǵaý vitse-ministri Erlan Áýkenovtiń tóraǵalyǵymen ótken áleýmettik jumystyń basym baǵyttary máseleleri jónindegi vedomstvoaralyq keńestiń otyrysynda aityldy.
Is-sharaǵa Qazaqstan Respýblikasyndaǵy adam quqyqtary jónindegi ýákil Elvira Ázimova, beiindi memlekettik jáne jergilikti atqarýshy organdardyń, úkimettik emes uiymdardyń qyzmetkerleri jáne t. b. qatysty.
Buǵan deiin habarlanǵandai, Shymkent qalasynyń turǵyny Áliia Mamýtovanyń Instagram paraqshasyndaǵy ótinishi tekserýge negiz boldy.
Áiel I toptaǵy múgedek qyzy mekemede 7 jyl boiy zorlanǵanyn habarlady. Onyń aitýynsha, epilepsiiamen aýyratyn qyzy esinen tanǵan kezde onyń denesine qol suǵylǵan.
Monitoring tobynyń quramyna beiindi memlekettik jáne jergilikti atqarýshy organdardyń, qoǵamdyq birlestikterdiń jáne basqa uiymdardyń ókilderi kirdi.
Tekserý barysynda qyzmet alýshylardyń quqyǵynyń buzylý faktileri jáne ortalyq qyzmetin uiymdastyrýda kemshilikter anyqtaldy.
Mysaly, birneshe palatada jatyn alańdar belgilengen normaǵa sáikes kelmeidi, iaǵni tiisti 5 m2 alańnyń ornyna qyzmet alýshyǵa 3-ten 4,5 sharshy metrge deiin keledi.
Keibir qyzmet alýshylardyń jeke jumys jospary ońaltýdyń jeke baǵdarlamasy eskerilmei jasalǵan.
Budan basqa, qyzmet alýshylar jumsaq inventarmen jáne kiimmen tolyq kólemde qamtamasyz etilmegen. Qyzmet alýshylardyń kiiminiń markirovkasy joq.
Sondai-aq, ashana, as bólmesi, azyq-túlik qoimasyn tekserý kezinde birqatar buzýshylyqtar anyqtaldy.
Kemshilikter ortalyqtyń laýazymdy adamdarynda tiisti baqylaýdyń joqtyǵyn kórsetedi, as bloktarynda jáne basqa da úi-jailarda antisanitariialyq jaǵdailardan qyzmet alýshylardyń jappai juqtyrý qaýpi bar.
Sonymen qatar, 2020 jyly Eńbek jáne halyqty áleýmettik qorǵaý ministrliginiń jumys tobynyń músheleri obektige barý barysynda bergen eskertýlerge mekeme basshylyǵynyń áreketsizdigi jáne álsiz áreket etýi atap ótildi.
Sońǵy tekserý arnaýly áleýmettik qyzmet kórsetý boiynsha buzýshylyqtar joiylmaǵanyn kórsetti.
Tekserý nátijesi boiynsha Shymkent qalasynyń ákimdigine Eńbekmininen biliktilik talaptaryn eskere otyryp, ortalyq direktory Myrzahan Joltaevty atqaratyn laýazymynan bosatý jáne mekeme basshysyn qoǵamnyń belsendi ókilderi qatarynan taǵaiyndaý týraly máseleni qaraý jóninde usynys jiberildi.
Sondai-aq, keńes barysynda balalarǵa arnalǵan 20 meditsinalyq-áleýmettik mekemeniń basshylaryna qatysty jazalaý sharalary jaiy aityldy.
Osylaisha, barlyǵy 13 qyzmetkerge qatysty jaza qoldanyldy, onyń ishinde 4 ortalyq basshysy jumystan bosatyldy (3 direktor jáne direktordyń orynbasarlary; ShQO, Túrkistan oblysy jáne Nur-Sultan qalasynda), Shymkent qalasynyń № 6 ortalyǵy men Soltústik Qazaqstan oblysynyń «Arman» arnaýly áleýmettik qyzmet kórsetý ortalyǵynyń direktorlaryna qatysty jaza qoldanyldy.
4 ortalyqtyń direktorlaryna (Atyraý, Jambyl, Qostanai jáne Qaraǵandy oblystary) qatysty «sógis» túrindegi tártiptik jaza usynyldy.
Sondai-aq, 6 MÁM boiynsha buzýshylyqtar tolyǵymen joiyldy.
Almaty jáne Mańǵystaý oblystarynyń eki ortalyǵynda birinshi basshylardyń rotatsiiasy usynyldy.
