Shymkenttegi balabaqshalar 25 mamyrdan bastap ashylatyn boldy. Bul týraly qalalyq bilim basqarmasynyń basshysy Janat Tájieva málimdedi, dep habarlaidy "Ult aqparat".
Basqarma basshysynyń aitýynsha, mektepke deiingi mekemelerge balalardy qabyldaýy boiynsha jańa algoritm qabyldanǵan. Oǵan sáikes, balabaqshaǵa barǵysy keletin balalar men ondaǵy tárbieshilerden densaýlyǵy týraly anyqtama talap etiledi.
«Algoritmge sáikes, birinshi kezekte balany pediatrdyń anyqtamasymen qabyldaityn bolamyz. Balanyń densaýlyǵy jaqsy ekenin dáleldeitin qujattardy suraimyz. Sonymen qatar, balabaqshadaǵy qyzmetkerlerdiń de densaýlyqtary jóninde árqaisysynan anyqtamasyn talap etemiz. Budan bólek, ata-anasy nemese olarmen qarym-qatynastaǵy týystarynyń da saýlyǵy jazylǵan qujattaryn suratyp, arnaiy tekserýden keiin ǵana balalardy balabaqshaǵa kirgizemiz»,- dedi Janat Tájieva.
Basqarma basshysy bul júieniń saqtyq sharalary men qoǵam qaýipsizdigi úshin qolǵa alynǵanyn aitady. Onyń sózinshe, ár toptaǵy bala sany 15-ten aspaidy. Qazirgi kezde osy maqsatta arnaiy tizim jasaqtala bastaǵan. balabaqshaǵa kelýshi búldirshinder men barsha qyzmetkerlerdiń sát saiyn dene qyzýy tekserilip, qoldary arnaiy antiseptiktermen zalalsyzdandyrylyp otyrmaq. Qalanyń bas pedagogy saqtyq sharalary úshin balalardyń ara qashyqtyǵy saqtalyp, balabaqsha aýmaǵy, ǵimarattyń ishi men syrtynda sanitarlyq talaptar qatań saqtalatynyn jetkizdi.
Aita keteiik, búginde millionnan asa halyq turatyn qalada barlyǵy 529 balabaqsha bar. Onda 77 myńnan asa búldirshin tárbielenedi.
