Shymkenttegi úsh jasar qyzdyń ólimine qatysty jańa derekter shyqty. Balany kórshisi óltirip alǵany anyqtalyp, ol qamaýǵa alynǵan. Bul týraly Shymkent ákimi Ǵabidolla Ábdirahymov habarlady.
"Osydan 3 kún buryn qalamyzda qaiǵyly oqiǵa oryn aldy. Aýlada oinap júrip, 3 jasar Káýsar ákesiniń artynan baramyn dep ózderiniń kórshisimen birge ákesi otyrǵan jaqqa júredi. Kishkentai Káýsardy jetektegen kórshisi qorshaýdy sekirip ótpekshi bolǵan kezde ony qolynan túsirip aldy. Talyp qalǵan sábidi kórip, kórshisi qorqyp, ony sol jerde qaldyryp ketken", - dep jazdy Shymkent ákimi áleýmettik jelidegi paraqshasynda.
Ol qamaýǵa alynyp, ústinen qylmystyq is qozǵalǵan. Ábdirahymov turǵynnyń mindetti túrde jaýapqa tartylatynyn aitty.
"Is-sapardan kelisimen oqiǵa ornyna baryp, mán-jaidyń barlyǵyn anyqtadym. Káýsarǵa qatysty eshqandai zorlyq jasalmaǵan. Káýsardyń ata-anasyna kóńil aittym, syndarly saǵatta bekem bolýǵa shaqyrdym. Káýsardyń jatqan jeri jaryq bolyp, Alla aldynan jarylqasyn. Ár bala biz úshin qymbat. Sábilerimizdiń qaýipsizdigine bárimiz jaýaptymyz. Qurmetti qala turǵyndary, balalarymyzdy saǵat saiyn baqylap qadaǵalap júreiik", - dep jazdy ol.
Ábdirahymov ákimshilik jáne qala politsiiasynyń tiisti jumystardy kúsheitetinin atap ótti. Búgin osy másele boiynsha arnaiy jinalys ótedi.
Esterińizge sala ketsek, demalys kúnderi Shymkenttegi aýdandardyń birinen 3 jasar qyzdyń máiiti tabylǵan edi. Keiin politsiia saraptama barysynda balanyń denesinen zorlyq-zombylyq belgileri tabylmaǵanyn habarlady. Qyz joǵarydan qulaý saldarynan óz qusyǵyna tunshyǵyp qalǵan. Biraq sábidiń anasy men týystary oǵan zorlyq jasalǵanyn aityp, saraptama nátijesine kúmán keltirgen bolatyn.
