Shymkentte 35 748 áskeri bólimniń sarbazdary ant qabyldady. Eldiń qalqany bolar 110 sarbaz jaýapkershiligin sezinip, qyzmetin adal atqarýǵa ant etti, dep habarlaidy "Ult aqparat".
Olardyń ishinde 30 sarbaz Aqmola oblysynan, 30-y Soltústik Qazaqstan jáne 50 jigit Almaty oblysynan kelgen.
Bólimniń komandiri, polkovnik Ashat Abdývaitov pen QR Qarýly kúshteriniń OQO boiynsha ardagerleriniń tóraǵasy, podpolkovnik Babai Aldabergenov jas sarbazdardy merekemen quttyqtady. Qiyn da jaýapkershiligi mol qyzmetterine sáttilik tiledi.
«Sarbazdar bergen anttaryna adal, attaryna zaty laiyq azamattar bola bersin! Áskeri mindet - óte mańyzdy, abyroily is. El aldynda, Otan aldynda, halyqtyń aldynda mindetterindi adal atqaryp, úilerińe aman-saý oralyńdar. Biz senderden úlken úmit kútemiz!», - dedi Babai Aldabergenov.
Jalpy, jas sarbazdar úshin bul kúnniń orny erekshe. Eń bastysy, Otan aldyndaǵy boryshyn adal atqarý men el aldynda jaýapty azamat ekenin tereń sezinetin kún. Saltanaty jiyn jabyq dep jariialanǵannan soń áskeri bólim basshylary bólimniń klýbynda ata-analarmen kezdesip, áńgimelesti. Olardy mazalaǵan saýaldarǵa jaýap berdi. Sonymen qatar alystan at terletip kelgen ata-analar ózderiniń balalary jatyp demalatyn, tamaq ishetin oryndarmen tanysty. Jiyn sońynda áskeri bólimniń kórkem ónerpazdarynyń shaǵyn merekelik kontsertine ulasty.
