Foto: Úkimet
Prezidenttiń tapsyrmalaryn oryndaý sheńberinde Qazaqstanda elge qaitarylǵan zańsyz shyǵarylǵan aktivter esebinen áleýmettik jobalardy iske asyrý boiynsha jumys jalǵasyp jatyr. Úkimet Arnaýly memlekettik qordan Shymkent qalasyndaǵy «Sairam kómekshi mektep-internat-kolledji» kesheni úshin jataqhana salýǵa 2,6 mlrd teńgeden astam qarajat bóldi, dep habarlaidy Úkimettiń baspasóz qyzmeti.
Belgili bolǵanyndai, ǵimarat 300 orynǵa eseptelgen. Jobada uldar men qyzdarǵa arnalǵan bólek bloktar, meditsinalyq blok, ashana, oiyn bólmeleri jáne basqalary qarastyrylǵan.
Jataqhana barlyq zamanaýi talaptarǵa sai bolady. Búginde «Sairam kómekshi mektep-internat-kolledji» arnaiy kesheninde 363 adam oqyp jatyr. Jańa ǵimarattyń qurylysy 120 oqýshyǵa arnalǵan jataqhanadaǵy oryn tapshylyǵyn joiýǵa múmkindik beredi. Nysan 1975 jyly salynǵan. Qazirgi ýaqytta oryn tapshylyǵyna bailanysty oqý ornyndaǵy keibir kabinetter balalarǵa arnalǵan jatyn bólmeleri retinde qarastyrylǵan.
67 oqýshy úide oqýǵa májbúr. Jańa jataqhana balalardyń ómir súrýine jáne olardyń sapaly bilim alýyna qolaily jaǵdai jasaidy.
Buǵan deiin Úkimet Aqmola oblysynyń Zerendi aýylynda sport keshenin, Túrkistan oblysynyń Temirlan aýylynda mýzyka mektebin, Arqalyq qalasynda daryndy sportshy balalarǵa arnalǵan sport keshenin, Astanada tirek-qimyl apparaty buzylǵan balalarǵa arnalǵan ońaltý ortalyǵyn, Almatyda erekshe qajettilikteri bar adamdarǵa arnalǵan jattyǵý ortalyǵyn, Aqtóbe qalasynda erekshe balalarǵa arnalǵan arnaiy balabaqsha, Atyraý oblysynyń Jamansor aýylynda mektep salý, Ridder qalasynda kópbeiindi aýrýhana kesheniniń qurylysyn aiaqtaý sekildi jobalardy iske asyrý úshin qarajat bólý týraly sheshim qabyldaǵan bolatyn. Jumys jalǵasyp jatyr.
Shymkent qalasyndaǵy Sairam kómekshi mektep-internat-kolledjiniń tárbielenýshileri úshin 300 oryndyq jataqhana salynady. Úkimet Arnaýly memlekettik qordan osy maqsattarǵa 2,6 mlrd teńgeden astam qarjy bóldi. Osynyń arqasynda jataqhanada oryn tapshylyǵy máselesi sheshiledi. Qazirgi jataqhana tek 120 adamǵa arnalǵan, oqýshylar sany – 363, al 67 oqýshy úide oqýǵa májbúr.
«Bul jerdegi eń qiyn másele – jataqhana. 120 balaǵa arnalǵan ǵimaratta 360 bala onyń ishinde erekshe qajettilikteri bar balalar oqyp, turyp jatyr. Máseleni sheshý úshin 300 orynǵa eseptelgen jataqhana qurylysyna jobalaý-smetalyq qujattama daiyndaldy. Ǵimarat qosymsha úi-jailarmen jabdyqtalady», — dep atap ótti Shymkent qalasy Bilim basqarmasynyń mamany Erlan Pirimqulov.
Zamanaýi jataqhana salý erekshe balalarǵa arnalǵan mekemeniń basty máselesin sheshedi.
«Meniń erekshe balam úshinshi synypta oqyp jatyr. Eger munda zamanaýi jataqhana salynsa, barlyq ata-ana alǵysyn bildirer edi. Memleket tarapynan búgingi tańda bul bilim berý mekemesine qoldaý kórsetiledi, qajetti jabdyqtar, jaqsy oqý-ádistemelik baza bar. Mundaǵy másele tek jataqhanadaǵy oryndardyń jetispeýshiliginde. Osy qajettilik jaqyn arada sheshiledi dep úmittenemiz», - deidi Shymkent qalasy «Sairam kómekshi mektep-internat-kolledji» tárbielenýshisiniń anasy Dilnora Hadjimetova.
Úkimet Aqtóbe qalasynda erekshe balalarǵa arnalǵan arnaiy balabaqsha salýǵa shamamen 7,8 mlrd teńge bólý týraly sheshim qabyldaǵanyn jazǵan bolatynbyz.
