Shymkentte koronavirýs juqtyryp, 14 sáýir kúni tańerteń qaitys bolǵan 58 jastaǵy er adam keshke Abai aýdanyndaǵy «Jibek joly» musylmandar ziratyna jerlendi. Bul týraly qalalyq meshittiń baspasóz hatshysy Muhamedjan Estemirov aitty.
Estemirovtiń sózinshe, marqumnyń janazasyn zirat basynda Qursai meshitiniń imamy Baýyrjan Baijanov 15 metr qashyqta turyp oqyǵan. Janazaǵa marqumnyń bir týysy men úsh maman qatysqan.
Qalalyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Ábdimanap Túlebaev janazaǵa jáne jerleý rásimine qatysqandar indetke qatysty barlyq qaýipsizdik sharalaryn saqtaǵanyn aitady.
Shymkent qalasy ákimdiginiń dereginshe, qaitys bolǵan 58 jastaǵy er adam – Túrkistan oblysy Qazyǵurt aýdany Rabat aýylynyń turǵyny. 11 sáýir kúni dene qyzýy kóterilip, juqpaly aýrýlar aýrýhanasyna túsken. Buǵan deiin arteriialyq gipertenziia aýrýymen aýyrǵan. 14 sáýir kúni tańerteń jan saqtaý bóliminde qaitys bolǵan. Onymen qarym-qatynasta bolǵan balasy oqshaýlanǵan.
Qazyǵurt aýdandyq ákimdiginiń ókili Oraz Qazybaevtyń aitýynsha, marqum balasymen birge Qaraǵandy men Novosibirge júk tasyǵan. Osydan bes jyl buryn áieli qaitys bolǵan. Keiingi jyldary Shymkenttegi balasymen birge turǵan. Aýyldaǵy úiinde eshkim turmaidy.
5 sáýirde Shymkentte koronavirýstan 1964 jyly týǵan Túrkistan oblysy Maqtaral aýdany Atakent aýylynyń turǵyny qaitys bolǵan edi. Marqum qala shetindegi hristian ziratyna jerlengen.
Shymkentte 39 adamnan koronavirýs tabyldy. Eki naýqas dertten aiyqty.
