Ońtústik Qazaqstan oblysy ákimdiginiń úlken májilis zalynda oblystyq mádeniet basqarmasynyń basshysy Nurbolat Ahmetjanovtyń qatysýymen "Túrkistan - túrki áleminiń mádeni astanasy" jyly aiasynda TYRKSOY uiymyna múshe elder sýretshileriniń XX pleneri boiynsha dóńgelek ústel ótti, dep habarlaidy "Ult aqparat".
Plenerdiń maqsaty – táýelsiz elimizdiń salt-dástúrin, ádet-ǵurpyn, ǵasyrlardan syr shertken qasietti mádeni sáýlettik eskertkishterin, tarihi oryndar men ulttyq ónerdi nasihattaý maqsatynda túrki tildes elderdiń eńbek sińirgen óner qairatkerleri jəne talantty qylqalam sheberlerimen keskindeme salasy boiynsha ózara tájiribe jáne pikir almasýdy júzege asyrý bolyp tabylady. Sonymen qatar Ońtústik óńiriniń ózindik tabiǵi geografiialyq erekshelikteri men kóz tartarlyq oryndaryn beineleitin halyqaralyq deńgeidegi óner shyǵarmalaryn jasap, nasihattaý. Beineleý ónerinde jańa kórkem baǵyttar jáne plastikalyq sheshimder men formalardy izdestirý de nazarda.
Plenerge Túrkiia, Túrkimenstan, Ózbekstan, Qyrǵyzstan, Resei Federatsiiasy, Ýkraina, Bolgariia, Moldaviia sekildi 9 elden 17 sýretshi, al elimizden Astana, Almaty, Pavlodar, Shymkent qalalarynan 13 kásibi sýretshi, Qazaqstannyń eńbek sińirgen qairatkerleri, kórkem akademiiasynyń músheleri jáne óner professorlary shaqyryldy.
Dóńgelek ústel barysynda oblystyq mádeniet basqarmasynyń basshysy Nurbolat Qadyruly Elbasy N.Á.Nazarbaevtyń «Bolashaqqa baǵdar: rýhani jańǵyrý» maqalasynda kórsetilgen «Týǵan jer» baǵdarlamasyn júzege asyrýda da atalǵan sharanyń mańyzy zor ekenin jetkizdi.
Týǵan jerdiń kieli oryndary men tarihi mekenderin dáriptep, urpaq balasyna jetkizý, qylqalam óneri arqyly sheksiz tabiǵat sulýlyǵy keńistigin kórsetý rýhani jańǵyrýdy nasihattaýdaǵy orny erekshe joba sanalady. Osy oraida TÚRKSOI halyqaralyq uiymynyń ókili Sanjar Mýlazymoglý Qazaqstannyń sulý mekenderi sýretshiler úshin shabyt shaqyryp, shyǵarmashylyq sezimin oiatýǵa úndeitin birden-bir jol ekenin aitty.
QR sýretshiler odaǵynyń múshesi Seisenhan Mahanbetov óńirdegi kieli oryndar men tabiǵat aiasyn sýretteý jáne qylqalam sheberleriniń shyǵarmashylyq turǵyda bas qosý sharalary Ońtústikte joǵary deńgeide uiymdastyrylatynyn aita kele apta kóleminde birneshe baǵytta júretin TÚRKSOI uiymyna múshe elder sýretshileriniń pleneri de ózindik tyń dúnielermen tolyǵatynyna senim bildirdi.
Buqaralyq aqparat quraldarymen kezdesken qylqalam ieleri kieli Túrkistan qalasyna jol tartty. Úsh kún kóleminde rýhani astananyń kórikti jerleri men kesene aýmaǵynan etiýdtik jumystar júrgizilip, kestege sáikes Otyrar aýdanyndaǵy Arystan bab kesenesi men tarihi, mádeni eskertkishter jáne Han taǵy, Qarataý qoryǵy aýmaǵy, Báidibek aýdanynyń Aqmeshit, Qostura aimaǵy men Qazyǵurt, Sairam-Ógem taý shatqaldary, Shymkent qalasynyń kórikti oryndarynda jalǵasyn tabady.
2017 jyldyń 22 tamyzy kúni oblystyq beineleý óneri mýzeiiniń kórme zalynda plener barysynda salynǵan jumystardyń qorytyndy kórmesiniń ashylý saltanaty men marapattaý rásimi ótetin bolady.
