Shymkent qalasynda Elbasymen attas azamat turady. Aty — Nursultan. Tegi — Nazarbaev. Iaǵni, Nursultan Nazarbaev. «NazMed» meditsina ortalyǵynda bas dáriger bolyp qyzmet atqaratyn ol, Elbasymen attas bolý úlken jaýapkershilik júkteitindigin aittady, dep jazady QazAqparat agenttigi.
«Bul esimdi ielený men úshin úlken abyroi, maqtanysh, ári úlken jaýapkershilik. Eń bastysy Elbasynyń atyna kir keltermeýim kerek. Mektepte jaqsy oqydym. Joǵary oqý ornyn da úzdik bitirdim. Árdaiym Elbasyndai kóshbasshy bolýǵa umtyldym», – deidi ol.
Nursultan Nálihanuly 1989 jyly Tashkent qalasynda dúniege kelgen. Atasy Nazarbai sol kezdegi Qazaqstan Kompartiiasy Ortalyq Komitetiniń hatshysy qyzmetin atqaryp júrgen N.Á.Nazarbaevtyń jolyn bersin degen nietpen esimin Nursultan qoiypty. Sebebi, sol kezdegi qazaq jastarynyń arasynan shyqqan kóshbasshyǵa degen otbasynyń qurmeti joǵary bolǵan.
«Biz úide bir qyz, eki ulmyz. Úlkenimiz — Gúljanat. Al, menen keiingi inimniń esimi Nurislam. Ol dúniege kelgen kezde Ózbekstan men Qazaqstan arasyndaǵy dostyq beki túsken bolatyn. Sondyqtan atam, eki el Prezidentteriniń esimderindegi «Nur» jáne «Islam» sózderin alyp, «Nurislam» dep atady», – deidi ol.
30 jastan endi asqan Nursultan Nazarbaevpen kezdesken jandar esimin estigen kezde tań qalysady eken. Alǵashqyda senbeitinder, kýáligin kórgen soń, sýretke túsip, selfi jasaidy.
«Aldyma kelgen patsientter beidjigimde jazylǵan esimimdi kórip, senbei qaita surap jatady. Is-saparmen júrip, kei mekemelerge tirkelmekshi bolyp, qujatymdy usynǵan kezde de betime tań qalysyp qaraityndar kóp. Birde jol patrýldik politsiia qyzmetkeri toqtatty. Sheni aǵa leitenat eken. Qujattarymdy kórisimen kapitanyn shaqyryp, esimim jazylǵan qujattardy kórsetti. Ekeýide kúlip qarap, sáttilik tiledi», - deidi Nursultan.
Jalpy Shymkenttik Nazarbaevtar otbasyn kópshilik dárigerler dinastiiasy dep biledi. Ákesi men ápkesi aq halat kiip, halyqqa qyzmet etip júr. Al, Nursultannyń ózi búginde ǵylym jolyn ustanǵan. Magistrlikti támamdap, doktorlyqty oqyp jatyr. Ári kásibi maman. Bilikti basshy. Joǵary dárejeli hirýrg.
«Adamda arman kóp qoi. Meniń bir armanym — Elbasymen kezdessem», – deidi ol.
