Shymkentte tótenshe jaǵdailar boiynsha keshendi oqý-jattyǵýlary aiaqtaldy. Úsh kúnge sozylǵan shara barysynda azamattyq qorǵanys salasy qyzmetkerleri tótenshe jaǵdai kezindegi turǵyndardy qaýipsiz jerlerge kóshirip, sýdan qutqarý jumystaryn pysyqtady, dep habarlaidy Ult.kz tilshisi QazAqparat agenttigine silteme jasap.
Oqý-jattyǵý barysynda Shymkent qalasynda jalpy qalalyq seismo jattyǵý sharasy ótkizildi. Onda 7 baldyq kúshi bar jer silkinisi oryn alǵan jaǵdaida zardap shekken jáne baspanasyz qalǵan halyqty qabyldaýǵa arnalǵan shatyrly qalashyq qurylyp, tótenshe jaǵdaiǵa daiyndyq barysy praktika júzinde pysyqtaldy. Onda 128 adam jáne 35 tehnika jumyldyryldy. 100 myńnan astam adamdy ýaqytsha ornalastyrýǵa bolatyn qalashyqtyń qurylymyna qala ákimshiligi, qabyldaý pýnkti, tirkeý orny, aqparat pen bailanys pýnkti jáne poshta-telegraf kirdi. Bul jerde turǵyndar sýyq mezgilde jatyn orynmen, taǵammen, sýmen, jyly kiimmen, sonymen qosa, meditsinalyq, qoǵamdyq tártipti qorǵaý, órtke qarsy kólik quraldarymen qamtamasyz etildi. Qutqarýshylar qala jurtshylyǵyna jer silkinisi kezindegi daǵdylardy úiretip, azamattyq qorǵanys sharalaryn elekten ótkizdi. Seismikalyq belsendilikten Turan móltekaýdanynda ornalasqan №5 toǵyz qabatty turǵyn-úide gaz qubyr jelisiniń buzylýy oryn alyp, úidiń kireberisinde gaz qospasynyń jinalýyna alyp keldi, jetinshi qabattaǵy páterde janýǵa ulasqan gazdyń jarylýy oryn aldy. Úidiń turǵyndarynan «101» pýltine órt týraly qońyraýlar túse bastady. Oqiǵa ornyna №2 joǵary shaqyrylym boiynsha Órt sóndirý jáne avariialyq-qutqarý qyzmetiniń kúshteri men quraldary jiberildi. Barlyǵy jeke quramynda 76 adam, órtke qarsy qyzmettiń 11 tehnikasy, jedel-qutqarý jasaǵynyń, apattar meditsinalyq ortalyǵynyń qyzmetkerleri, №6506 áskeri bóliminiń áskeri qyzmetshilerinen barlyǵy 30 adam jumyldyryldy. Jospar boiynsha jumyldyrylǵan energiia jelisi, gazben jabdyqtaý, sý kanaly qyzmetteri energiia qýatyn sóndirý, gaz taldaýyshpen gazdyń shyǵýyn izdestirý jáne órtti sóndirý úshin sý tartqysh jelide sýdyń qysymyn kóterý boiynsha jumystar júrgizdi.
Bul praktikalyq is-sharalar azamattyq qorǵanys qyzmetiniń bolýy múmkin tótenshe jaǵdailardyń saldaryn joiýǵa daiyndyq deńgeiin kóterýge múmkindik berdi. Ekinshi kúni sý aidynynda ótken jattyǵý kezinde de qaýipsizdik jaǵdailary jan-jaqty pysyqtaldy. Sebebi, biylǵy jyly oblysta 30-dan asa adamnyń sýǵa batý jaǵdailary oryn alǵan. Onyń teń jartysynda balalar zardap shekken.
TJD qyzmetkerleri oqý jattyǵý sharalaryn uiymdastyrý úshin qala syrtyndaǵy «Jailaýkól» sý aidynyna bardy. Stsenarii boiynsha qaýipsiz sharalaryn saqtamaǵan qaiyqtaǵy ekeýge qutqarýshylar dereý kómekke keldi. Sýǵa batyp bara jatqan zardap shegýshilerdi qutqarýshylar shuǵyl jaǵaǵa shyǵaryp, olarǵa alǵashqy kómek kórsetti. Al, búgin tańsáriden bir mezette dabyl qaǵylyp, shuǵyl túrde habarlandyrý júieleri iske qosyldy. Dabyl daýsynan syrtqa shyqqan turǵyndar jer silkinisi kezindegi daǵdylaryn pysyqtady.
Jalpy, arnaiy stsenariige qurylǵan mundai oqý-jattyǵý sharalary shahar aýmaǵynda qatarynan 3 kún boiyna júrgizildi. Mundai shtattyq mashyqtaný jumystary eki jylda bir ret ótkiziledi.
