Shymkentte tórt ai buryn sottalǵan 28 politseidiń tórteýi búgin bostandyqqa shyqty.
Búgin qalalyq sottyń qylmystyq ister jónindegi appeliatsiialyq soty osyndai úkim shyǵardy, dep habarlaidy "Ult aqparat".
Sottalǵandarǵa qylmystyq top quryp, urlanǵan kólikter men qosalqy bólshekterge jalǵan qujattar jasaǵan jáne para alǵan degen aiyptar taǵylǵan bolatyn. Túrmeden bosatylǵandardyń tórteýi ákimshilik politsiiaǵa qarasty aýdandardaǵy tirkeý-emtihan bóliminiń inspektorlary qyzmetin atqarǵan. Al bireýi, Jetisai aýdandyq avtomekteptiń oqytýshysy bolǵan. Sottyń úkimine sáikes, bostandyqqa shyqqandardyń jazalary Prezidenttiń tiisti zańǵa ózgeris engizýinen keiin jeńildetilgen.
«Jańa zańǵa sáikes qylmystyń jeńil túrin jasaǵandarǵa ýaqytsha tergeý abaqtysynda ótkizgen bir kúni eki kúnge sanalady. Sonymen qatar bas bostandyǵy shektelgenderdiń de jazasy jeńildetilgen. Bul zań sottalǵan bes azamatqa qoldanýǵa jatady, esepke alynady da, bular endi bosatylady»,- dedi Shymkent qalalyq sotynyń qylmystyq ister jónindegi appeliatsiialyq alqasynyń tóraǵasy Erbol Janǵazin.
Aita keteiik, ótken jyldyń qarasha aiynda jalǵan júrgizýshi kýáligin ońdy-soldy taratyp, kólikterdi qylmystyq jolmen rásimdegen 28 politsei men 10 deldal túrli merzimderge sottalǵan bolatyn. Sot aiyptalýshylardyń keibirin naqty uiymdasqan qylmysqa qatysy joq dep tanyp, Qylmystyq kodekstiń 268 baby boiynsha aqtaǵan. Úkimniń osy tusyna kelispegen prokýrorlar narazylyq keltirip, appeliatsilyq alqaǵa shaǵym túsirgen. Alaida sot bul bap boiynsha politseilerdiń kinásin dáleldeitin dáiekter joq dep taýyp, úkimdi kúshinde qaldyrdy. Al, daý bolǵan 341 avtokóliktiń qosalqy bólshek retinde kelip, olarǵa jalǵan qujat jasaý qylmysyn bul isten bólek shyǵarǵan.
Eske salaiyq, sottalýshylarǵa qyzmetin asyra paidalanǵan jáne jalǵan júrgizýshi kýáligin jasaǵan degen aiyp taǵylǵan. Tirkeý-emtihan bóliminde otyrǵandar, shetelden bólshektenip ákelingen kólikterge qujat jasap, túrli somaǵa rásimdep berip otyrǵany dáleldengen. Sot barysynda 341 avtokólikke jalǵan qujat jasalǵany anyqtalyp, politseiler qylmystyq topty uiymdastyrdy degen aiyppen sottalǵan.
Ońtústik Qazaqstan oblystyq ishki ister departamenti emtihan-tirkeý bóliminiń burynǵy bastyǵy Artyq Japparov 11 jylǵa bas bostandyǵynan aiyrylsa, Sairam, Báidibek, Maqtaaral aýdandarynyń jáne Túrkistan qalasynyń tirkeý-emtihan bólimderiniń burynǵy bastyqtarynyń árqaisysyna 10 jylǵa jaza kesilgen edi. Sondai-aq, birqatar memlekettik jol inspektory men kriminalister, deldaldar ártúrli merzimge bostandyǵy shektelip, memlekettik qyzmette jumys isteý quqynan ómir boiyna aiyrylǵan bolatyn jáne olardyń arnaiy ataqtary qaitarylyp alyndy.
