Shymkentte temirjol vokzalynan órt shyqty, – dep habarlaidy QR IIM TJK baspasóz qyzmeti.
«21 qańtar kúni saǵat 02.07 kezinde órtke qarsy qyzmet pýltyna Shymkent qalasyndaǵy temirjol vokzalynyń ekiqabatty ǵimaratynan órttiń shyqqany týraly habarlama kelip tústi. Anyqtalǵanyndai, ǵimarattyń birinshi qabatyndaǵy qosalqy bólmede jihazdar men qaǵaz qoraptar órtenip, tilsiz jaý 6 sharshy metrdi jaiylǵan», - delingen habarlamada.
Oqiǵa ornyna jetken órt sóndirýshiler tilsiz jaýdy birer minýttyń ishinde aýyzdyqtaǵan. Qutqarýshylar kelmei turyp, ǵimarattan 30 shaqty adam syrtqa shyǵyp úlgergen. Zardap shekkender men jaraqat alǵandar joq. Órtti sóndirýge jeke quramnan 52 adam men 12 órt sóndirý tehnikasy jumyldyrylǵan. Politsiia qyzmetkerleri órtti sóndirý barysynda vokzal aýmaǵyn qorshap, azamattardyń qaýipsizdigin qamtamasyz etken.
