Shymkentte sý tasqynynan zardap shekken Eltai aýylynyń turǵyndary búgin baspanaly boldy. Qala ákimi Murat Áitenov 5 otbasyǵa jańa úilerdiń kiltin tabys etti, dep habarlaidy "Ult aqparat".
Qurylysy bir jarym aida aiaqtalǵan úilerdiń aýmaǵy 112,36 sharshy metrdi quraidy. Al, qabyrǵalary gazabloktan qalanǵan. Shatyry profnastilmen jabylǵan. Budan bólek, ishki jáne syrtqy árleý jumystary da tolyq júrgizilgen. Jańa baspanalardy «Bi Group» kompaniiasy óz qarjysy esebinen salyp berdi. Aýyl turǵyndaryn jańa qonysymen quttyqtaǵan qala basshysy atalmysh qurylys mekemesine alǵysyn jetkizdi.
Aita keteiik, kóktemgi mezgilde sý basqan Eltai turǵyn alabyn qaita qalpyna keltirý jumystary áli kúnge jalǵasýda. Munda 5,5 shaqyrymdy quraityn 3 kóshe men 1 kópirge ortasha jóndeý júrgizilip jatyr. Bul jumystarǵa biýdjetten 186,5 mln teńge qarjy qarastyrylǵan.
