© Photo: Pexels / Tima Miroshnichenko
Shymkentte tanystary men týystaryn 340 mln teńgege san soqtyrǵan qylmystyq top sottaldy, – dep habarlaidy Polisia.kz.
Shymkent politsiiasyna uqsas mazmundy aryz-shaǵymmen 235 adam júgingen. Olar jalǵan tendrmen ainalysatyn alaiaqtardyń qurbany bolǵanyn aityp, tártip saqshylarynan kómek suraǵan.
Jábirlenýshilerdiń sózinshe, óz tanystary “tendrmen ainalysatyn bastyǵyna” kómek qajettigin alǵa tartyp, nesie rásimdeýge úgittegen. Jasaǵan jaqsylyǵy úshin tiesili úlesin berýge jáne bank aldyndaǵy qaryzdy tolyq óteýge ýáde etken.
Olar nesieni kóbinese taýarlai rásimdetip, alynǵan qymbat tehnikany qaita satyp, shyqqan somanyń 10-12% paiyzyn syiaqy retinde berip otyrǵan. Alaida ai saiynǵy tólem ýaqyty kelgende, kúdiktiler qońyraýǵa jaýap bermei, “izin sýytqan”. Nátijesinde nesie ósimi kóbeiip, azamattar qaryzǵa belshesinen batqan.
11 adamnan turatyn qylmystyq toptyń qurbandary Túrkistan oblysynyń jáne Shymkent qalasynyń turǵyndary bolyp shyqty.
"Atalǵan jaitty tergeýshiler QR QK-niń 190-baby (Alaiaqtyq) boiynsha tirkedi.
Belgili bolǵandai, alaiaqtar toby 23-43 jas aralyǵyndaǵy, 4 áiel jáne 7 er adamnan turǵan. Onyń ishinde eki bank menedjeri bar. Olardyń árqaisysynyń óz mindetteri bolǵan: keibiri nesie alatyn adamdardy tabýmen, taǵy ekeýi ony rásimdeýmen, qalǵandary satyp alynǵan taýarlardy alyp-satýmen ainalysqan.
Keltirilgen shyǵyn kólemi 340 mln teńgege jýyq. Aryzdanýshylar ártúrli bankten 250 myń teńgeden 6 mln teńgege deiin qaryz alǵan.
Tártip saqshylary jinaqtalǵan is-qujattardy aiyptaý aktisimen sotqa joldady. Aiyptalýshylardyń árqaisysy jasaǵan qylmysy úshin 5 jylǵa deiin sottaldy" - delingen habarlamada.
