Foto: Shymkent TJD baspasóz qyzmeti
Shymkent qalasynyń tótenshe jaǵdailar departamenti halyqqa eskertý jasady. Eki kúnniń ishinde eki bala tereńdigi jarty metrden aspaityn sýǵa batyp ketti, dep habarlaidy Sputnik Qazaqstan.
Jazataiym oqiǵanyń biri 5 tamyzda Geologtar saiajaiynda bolǵan. Ata-anasynyń qaraýynsyz qalǵan eki jasar bala sýarý kanalyna batyp ketken. Kanaldyń tereńdigi – 50 sm, al eni – 1,5 metr. Balanyń máiitin týysy shyǵaryp aldy.
7 tamyzda Abai aýdanynda kósheden ótip bara jatqan adamdar Almaty tasjoly boiyndaǵy qalalyq tazartý júiesinde 2022 jyly týǵan qyzdyń máiitin tapty. Ol belgisiz jaǵdaida naýaǵa túsip, sýǵa batyp ketken. Tazartý júiesiniń tereńdigi – 40 sm, eni – 1 metr. Ol bala da ata-anasynyń qaraýynsyz qalǵan.
"Turaqty túrde júrgizilip jatqan reidterge, buqaralyq aqparat quraldaryndaǵy (teledidar, baspasóz) eskertýlerge qaramastan eki jazataiym oqiǵa tirkeldi. Ata-analar, balalarǵa abai bolyńyzdar", - deidi qutqarýshylar.
Jyl basynan beri qalada jeke úilerde ornatylǵan qańqaly basseinderde, sýarý kanaldarynda, sýburqaqtarda 7 jazataiym oqiǵa boldy. Barlyq jaǵdaida balalar ata-anasynyń qaraýynsyz qalǵan.
