Foto: Shymkent qalasy ákiminiń baspasóz qyzmeti
Shymkentte ardagerlerge "Uly Otan soǵysyndaǵy Jeńiske 80 jyl" merekelik medaldary tabystaldy. Sonymen qatar demeýshiler esebinen jańa kólikter syiǵa berildi, dep habarlaidy qala ákiminiń baspasóz qyzmeti.
Búginde qalada tek eki ardager - Mosýnova Nina Egorovna jáne Tólepbergenuly Murataly turady.
Qala ákimi Ǵabit Syzdyqbekov ardagerlerdi ataýly kúnmen quttyqtap, "Uly Otan soǵysyndaǵy Jeńiske 80 jyl" merekelik medaldaryn tabystady, memleket basshysy men QR Qorǵanys ministriniń atynan quttyqtaý hattaryn oqydy. Maidangerlerdiń qurmetine aýlalarda jeke sherýler uiymdastyryldy. Ardagerlerge demeýshiler tarapynan jańa kólikterdiń kiltteri tabystaldy.
Nina Egorovna Mosýnova 1924 jyly 9 naýryzda Resei Federatsiiasynyń Tatarstan óńirindegi Ýrýstamak aýylynda dúniege kelgen.1942 jyly óz erkimen ásker qataryna alynyp, Qazan qalasynda telegrafist mamandyǵyn meńgerip, keiin Gorkii qalasynda osy salada jumys istegen.
1943 jyly maidan shebine attanyp, Mojaisk mańyndaǵy shaiqasqa pýlemetshi retinde qatysqan. 36-shy áskeri bólimniń "Zenit" brigadasynda qyzmet atqaryp, radister bóliminiń komandiri bolǵan. Soǵystan keiin Bashkiriiadaǵy Oktiabrsk qalasynda kassir bolyp eńbek etken.
1948 jyly Qazaqstanǵa qonys aýdaryp, Shymkent qalasynda kitaphanashy bolyp jumys istegen. Al 1967 jyly "KazIýgvzryvprom" mekemesinde hatshy-mashinist qyzmetin atqardy. Jaýyngerlik erligi úshin "Germaniiany jeńgeni úshin" medalimen marapattalǵan.
Búginde Nina Egorovna bir balanyń anasy, eki nemere men bes shóbereniń ardaqty ájesi.
Murataly Tólepbergenuly 1925 jyly Jaskeshý aýylynda dúniege kelgen.
Jas sarbaz 1943 jyly nebári 18 jasynda qolyna qarý alǵan. Soǵys joly Brest qamalynan bastalyp, Varshava, Dansk, Vissmark, Bittenberg jáne Perleberg sekildi qalalardy azat etý shaiqastarymen jalǵasady. Jaýynger Jeńisti Germaniianyń Bittenberg qalasynda qarsy alady. Elge tek 1950 jyly oraldy.
Soǵystan keiingi beibit ómirde traktor brigadasyn basqardy, esepshi boldy, fermada basshylyq qyzmet atqardy. Eki ul men alty qyz tárbielep ósirgen abyz qariia búginde 21 nemere men 3 shóbereniń atasy.
Ol II dárejeli "Otan soǵysy" ordenimen, sondai-aq "Erligi úshin", "Varshavany azat etkeni úshin", "Germaniiany jeńgeni úshin" syndy birneshe medalmen marapattaldy.
Ardagerler - batyrlyqtyń, janqiiarlyqtyń jáne Otanǵa qyzmet etýdiń jarqyn úlgisi. Olardyń ómir joly - bolashaq urpaqqa ónege.
