Shymkentte «Probatsiia» áleýmettik-quqyqtyq qyzmet kórsetý ortalyǵy ashyldy, dep habarlaidy QazAqparat tilshisi.
Jazasyn ótep shyqqandar úshin arnaiy ashylǵan ortalyqta jumysqa ornalastyrý men qujattandyrý siiaqty birneshe qyzmet túrleri kórsetiledi.
Ult josparynyń 33-qadamyn júzege asyrý maqsatynda ashylǵan nysannyń ashylý saltanatynda oblys prokýrory Nurǵalym Ábdirov pen Qylmystyq-atqarý júiesi departamentiniń bastyǵy Ádilbek Dosmaǵambetov quttyqtaý sóz sóiledi.
Bas bostandyǵynan aiyrý oryndarynan bosatylǵan jáne probatsiia qyzmetiniń esebinde turǵan tulǵalarǵa áleýmettik-quqyqtyq kómek kórsetetin ortalyqtyń mańyzdylyǵyna toqtaldy. Munda kelýshiler endi meditsinalyq járdem men zańgerlik aqyl-keńester ala alady. Ortalyq mamandary zeinetaqy jáne járdemaqylardy rásimdeýge de kómek beredi. Tirkeýge alynǵa azamattarǵa áleýmettik-quqyqtyq jáne ózge de kómekterdi kórsetý úshin turaqty top qurylǵan. Bul toptar tiisti jumystaryn júrgizý úshin ortalyqtyń ishinen bólek eki qyzmettik bólmeler qarastyrylyp, qajetti jihazdarmen qamtamasyz etildi.
Saltanatty shara sońynda oblys ákimdiginiń Jergilikti politsiia qyzmetimen birlesip is-sharalar jospary bekitildi. Áriptestik, ózara qarym-qatynasty damytý jóninde yntymaqtastyq týraly kelisimderge qol qoiyldy.
Aita keteiik, ázirge mundai nysandar tek Shymkent qalasy men Shardara aýdanynan ashylyp otyr. Aldaǵy ýaqytta Túrkistan qalasy men Tólebi aýdanynan ashý josparlanýda.
