Maýsym aiynyń sońynda Shymkent qalasynda pnevmoniiamen aýyrǵan naýqastar sany 5,8 esege, jiti respiratorlyq virýsty infektsiiaǵa shaldyqqandar 2 esege ósti. Bul týraly qalalyq ákimdiktiń apparat basshysy Erkeǵali Álimqulov aitty, dep habarlaidy "Ult aqparat".
Erkeǵali Álimqulovtyń sózinshe, qazirgi tańda naýqastardy emdeý úshin bir mektep pen kolledjden, Jeńil atletika sport kesheninen qosymsha provizorlyq tósek oryndar daiyndaldy.
«Búginde qalada naýqastardy emdeý úshin 2870 tósek orny bar. Onyń 650-i juqpaly aýrýhanalarǵa, 2220-sy provizorlyq orynǵa arnalǵan. Osyǵan bailanysty jedel járdem qyzmetine qońyraý shalatyndar 5 esege kóbeidi. Orta eseppen bir kúnde 2100-ge jýyq shaqyrtý túse bastady. Shaqyrtýlarǵa der kezinde qyzmet kórsetý úshin Shymkent qalasynyń ákimi M.Áitenov arnaiy tapsyrma berdi. Osy tapsyrmaǵa sáikes qalada provizorlyq oryndar men kúndizgi statsionarlardy kóptep ashyp jatyrmyz. Búginde Samal-3 shaǵynaýdanyndaǵy jańa mektepten 400 oryndyq provizorlyq oryn, Politehnikalyq kolledjden 150 oryn ashyldy. Al aptanyń sońyna deiin 400 orynǵa jetkiziledi. Sondai-aq, búgin Jeńil atletikalyq sport kesheninen 150 oryn daiyndaldy jáne 1 shilde kúni ol 450 orynǵa jetkiziledi»,- dedi ol.
Aita keteiik, qalada juqpaly dertke shaldyqqan naýqastardy emdeý maqsatynda provizorlyq oryndardan bólek, kúndizgi statsionarlyq emdeý jumystarynyń da qyzmeti kúsheitilýde.
Pnevmoniia jáne JRVI dertine shaldyqqan naýqastar endi emhanalarda da em qabyldai alatyn boldy. Bul úshin memlekettik jáne jekemenshik meditsinalyq uiymdarda kúndizgi statsionardyń tósek qory keńeitildi. 14 memlekettik emhanada jáne 26 jekemenshik meditsina ortalyǵynda 623 tósek-oryn daiyndalǵan. Onda naýqastar tańerteńgi saǵat 8:00-20:00 deiin kúndizgi statsionarda em qabyldai alady. Mamandar dárigerdiń taǵaiyndaýy boiynsha naýqastarǵa tamyrdan jáne jambastan ekpe salý syndy emdeý sharalaryn júrgizedi.
