Búgin Ońtústik Qazaqstan oblysynda alǵash ret «Qazaqstannyń Uly Jibek jolyna saiahat» halyqaralyq festivali aiasynda eki kúndik «Ontustik Tourism. Invest 2017» týristik, investitsiialyq forýmy óz jumysyn bastady, dep habarlaidy "Ult aqparat".
Forým jumysyna QHR Memlekettik týrizm basqarmasy tóraǵasynyń orynbasary Dý Tszian men QR Mádeniet jáne sport ministrliginiń Týrizm indýstriiasy komitetiniń tóraiymy Mainýra Mýrzamadieva, Ońtústik Qazaqstan oblysynyń ákimi Janseiit Túimebaev pen «Kazakh tourism» ulttyq kompaniiasynyń tóraǵasy Rashid Kúzembaev, jalpy sany 500-ge jýyq adam qatysýda.
Forýmǵa shaqyrylǵan qonaqtardyń arasynda «Atameken» UKP ókilderi men halyqaralyq jáne qazaqstandyq týroperatorlar, investitsiialyq kompaniialar men týristtik assotsiatsiialar, sheteldik jáne qazaqstandyq BAQ ókilderi bar. Jiynda oblys ákimi Janseiit Túimebaev Ońtústik Qazaqstan oblysy búgingi tańda myqty ekonomikalyq áleýeti bar, turaqty damyp kele jatqan óńir ekenin atap ótti.
«Aimaq Orta Aziia, Taiaý Shyǵys pen Eýropa elderin bailanystyratyn joldardyń qiylysynda ornalasqan. Nátijesinde - shekaralyq saýda-sattyq pen eksporttyq óndiris órkendep, oblysymyzdyń týristik tartymdylyǵy kóbeiip, tamashalaýǵa kelýshi týrister sany jyl saiyn ósip keledi. Sondai-aq, óńirimizdiń jaǵymdy investitsiialyq imidji qalyptastyrylyp, ulǵaiiýda. Máselen, ótken jylmen salystyrǵanda týristik nysandar sany oblysta 31 paiyzǵa ósip, 195-ti qurady. Olarda kórsetilgen qyzmetter kólemi 43 paiyzǵa kóbeiip, 1,7 mlrd.teńgege jetti. Osynyń nátijesinde biyl Ońtústik Qazaqstan oblysyna 128 myń týrist kelse, bul ótken jylmen salystyrǵanda 55 paiyzǵa artqanyn kórsetedi», - dedi aimaq basshysy.
Sonymen qatar ákim ońtústikke kelýshi týristerge qolaily jaǵdai jasaý maqsatynda 1, 2 jáne 3 kúndik týristik marshrýttar ázirlenip, atalǵan marshrýtqa 84 tarihi-mádeni obektiler men tabiǵi oryndar engizilgenin jetkizdi. Sondai-aq, ol «Uly Jibek joly eskertkishteri» atalymy boiynsha 8 eskertkish iaǵni, Saýran, Túrkistan, Sidaq, Qaraspan, Jýantóbe, Kúltóbe, Otyrar, Bórjar eskertkishteri ońtústik óńirinde ornalasqanyn aitty.
QR Mádeniet jáne sport ministrligi men Ońtústik Qazaqstan oblysy ákimdigi uiymdastyrýymen ótip jatqan is-sharada týrizm salasyndaǵy áleýetti jobalar tanystyrylyp, olardy júzege asyrý joldary talqylanýda. Sala mamandarynyń basy qosylǵan jiynda sonymen birge Uly Jibek jolynda týrizm indýstriiasyn damytýdyń ózekti máseleleri men Jibek joly boiyndaǵy týristik ónimderdi damytý, óńirdiń investitsiialyq múmkindikterin tanystyrý jáne investorlardy tartý jaiy qaralmaq. Sondai-aq, qatysýshylar áleýetti seriktestermen V2V formatynda kezdesýlerge qatysyp, otandyq jáne halyqaralyq deńgeidegi sarapshylarmen suhbattasatyn bolady. Kelýshi qonaqtar sonymen birge Qazaqstannyń Jibek jolyna arnalǵan fotokórme, «Silk Road Fair» týristik jármeńkesin tamashalady.
