Shymkentte ókpesine sýyq tiip, jedel járdem shaqyrtqan naýqastar sany kúrt kóbeiip ketti. Bul týraly qalalyq densaýlyq saqtaý basqarmasy málimet taratty, dep habarlaidy "Ult aqparat".
Densaýlyq saqtaý basqarmasynyń málimetinshe, qaladaǵy epidemiialogiialyq qolaisyz jaǵdaiǵa bailanysty jedel járdemge túsetin qońyraýlardyń sany ósken. Búginde 103 qyzmetine kúnine orta eseppen 1800-2000 qońyraýǵa deiin kelip túsedi.
«Shaqyrtýlardyń basym bóligi - JRVI, pnevmoniia syndy infektsiialyq aýrýlar. JRVI diagnozymen aýrýhanaǵa jatqyzý - 2 ese (2019 jylǵy maýsym – 124, 2020 jylǵy maýsym – 260), pnevmoniia diagnozymen - 7,2 ese (2019 jylǵy maýsym-18, 2020 jylǵy maýsym -130) ósken. Infektsiialyq aýrýlardyń artýyna bailanysty qalada 1420 tósek-oryn ashyldy. Onyń ishinde 690 oryn infektsiialyq, 290-karantindik, 440-provizorlyq tósek-oryn ashylǵan. Osynyń esebinen oryn jetispeý problemasy rettelmek. Sondai-aq, 22 ókpeni jasandy jeldetý jáne 38 monitor apparaty qosymsha ornatylǵan. Buǵan qosa, 27 maýsymǵa deiin 40 ókpeni jasandy jeldetý apparaty ornatylady dep josparlanýda» delingen habarlamada.
Basqarmanyń málimetinshe, naýqastardyń aýrý juqtyr kórsetkishiniń artýyna saqtyq sharalarynyń tiisti deńgeide saqtalmaýy sebep bolǵan.
Turǵyndardyń basym bóligi áli de araqashyqtyqty saqtaý, qol gigienasy men maska taǵý syndy saqtyq sharalaryn elemei otyr.
