Shymkentte múmkindigi shekteýli jandar olarǵa qarastyrylmaǵan salyqtardy tólep kelgen. Mundai zańbuzýshylyqtardy qalalyq prokýratýra qyzmetkerleri áshkereledi, dep habarlaidy "Ult aqparat".
Qalalyq prokýratýra baspasóz qyzmetiniń málimetinshe, qadaǵalaý organdary júrgizgen tekserý jáne taldaý jumystarynyń nátijesinde 433 myń azamattyń quqyqtary qorǵaldy.
«QR Salyq kodeksine sáikes múmkindigi shekteýli (múgedek) azamattar múlik, kólik, jer jáne t.b. salyqtardan bosatylǵan, alaida salyq organdary atalǵan sanattaǵy azamattardan zańsyz salyq tóleýdi talap etip kelgen.
Prokýratýra organdarynyń yqpal etýimen atalǵan salyqtardy tólep kelgen múmkindigi shekteýli 1 200 azamattyń quqyǵy qorǵalyp, olarǵa zańsyz salynǵan salyq tólemderi qaitarylǵan», delingen habarlamada.
Sondai-aq, Qarataý aýdany prokýratýrasy qyzmetkerleri orta bilim berý uiymdarynyń pedagogtaryn meditsinalyq tekserilýden tegin ótýi qamtamasyz etilmei kelgenin anyqtaǵan.
«Qadaǵalaý aktisi negizinde 17 879 pedagogtyń meditsinalyq zerttep - qaraýdan tegin ótýine 18,9 mln teńge bólingen. Densaýlyq saqtaý uiymdaryna engizilgen qadaǵalaý aktisi negizinde 3 myńǵa jýyq kámeletke tolmaǵandarǵa zańmen belgilengen kepildi meditsinalyq kómektiń kólemi kórsetilgen. Qalalyq prokýratýranyń Tabiǵi monopoliialardy retteý, básekelestikti jáne tutynýshylar quqyqtaryn qorǵaý komitetiniń Shymkent qalasy boiynsha departamentine engizgen usynýy negizinde tabiǵi gazdyń 1 000 tekshe metri úshin tarif 3587,67 teńgeden 3497,91 teńgege azaitylyp, 11 myń tutynýshynyń quqyǵy qorǵaldy. Osy usynys aiasynda «Ońtústik» arnaiy ekonomikalyq aimaqtyń 14 kásipker sý paidalýshylary úshin sýdyń baǵasy 4,53 teńgege azaitylǵan. Eńbekshi aýdan prokýratýrasynyń Eńbek inspektsiiasy jáne kóshi-qon basqarmasyna bergen tapsyrmasyna sáikes júrgizilgen tekserý nátijesinde «Hlopkoprom-Tselliýloza»JShS 118 jumyskerge qaryz bolǵan 14 mln teńge jalaqysyn ótedi» delingen habarlamada.
