© Photo : pixabay/ds_30
Shymkent qalasyndaǵy orta mektepterdiń birinde asa iri kólemde aqsha jymqyrǵan esepshige qatysty tergeý bastaldy, dep habarlaidy Sputnik Qazaqstan Sybailas jemqorlyqqa qarsy is-qimyl agenttiginiń Shymkent qalasy boiynsha departamentine silteme jasap.
Ol 2020 jyldan bastap úsh jyl boiy jymqyrǵan qarajatyn jeke múddesine paidalanyp kelgen. Antikordyń aitýynsha, esepshiniń qarajatty jymqyrýyna birqatar mán-jailar yqpal etken.
"Mektep direktory elektrondy tsifrly qoltańbany (kaztoken) qoldana almaǵandyqtan buiryq shyǵaryp, bas esepshige júktep qoiǵan. Bas esepshi direktordyń jaýapsyzdyǵyn, qyzmetine degen salǵyrt qaraýyn jeke bas paidasyna paidalanyp, ózine zańsyz tapsyrylǵan elektrondy tsifrly qoltańbany qoldaný arqyly memleket qarajatyn jymqyryp otyrǵan. Bas esepshiniń qylmystyq is áreketinen memleketke jalpy sommasy 67 million teńge kóleminde asa iri kólemde zalal keltirildi", - deidi vedomstvo.
Antikordyń aitýynsha, bul zańbuzýshylyq mektep direktory men bilim basqarmasy tarapynan tiisti deńgeide qadaǵalaý bolmaǵandyqtan oryn alǵan.
"Biz sybailas jemqorlyqtyń aldyn alý boiynsha kóptegen is-shara ótkizip kelemiz. Alaida eńbegimiz zaia ketip júr me dep oilaimyn. Óitkeni bilim basqarmasy basshysynyń orynbasary jáne 96-shy mekteptiń direktory qylmystyq qýdalaýǵa ushyrady. Eki jyl buryn 132-shi mekteptiń direktory sybailas jemqorlyq jasady degen kúdikke ilindi, ókinishke qarai, bul bizdiń áriptesimizdiń óz-ózine qol jumsaýymen aiaqtaldy. Ótken jyldyń basynda qalalyq bilim bóliminiń bas mamany men esepshisi isti boldy. Sondai-aq búgingi tańda Shymkenttegi eki balabaqshanyń esepshisi para aldy degen kúdikke ilindi. Jemqor óz áreketin jasyrýǵa qansha tyryssa da, erte me, kesh pe bári shyǵady", - dedi Shymkent qalasy bilim basqarmasynyń basshysy Janat Tájieva.
