Shymkentte komendanttyq saǵatty buzǵan 33 quqyq buzýshy ákimshilik jaýapkershilikke tartyldy. Onyń ishinde 25 quqyq buzýshy qamaýǵa alyndy, dep habarlaidy QazAqparat.
Qalada qylmyskerlerdi anyqtaý maqsatynda ekstremizm jáne kóshi-qon jelisi boiynsha jedel-izdestirý is-sharalary júrgizilýde. Blok beketterde 7000-nan astam avtokólik tekserilgen. Nátijesinde jappai tártipsizdikke qatysty degen kúdikpen 8 azamat ustaldy.
«Kúdiktilerden 6 patrony bar 16-mm kalibrli tumsyǵy kesilgen qarý, 5 jaýyngerlik patrony bar 9-mm jaýyngerlik kalibrge qaita jasalǵan 1 travmatikalyq tapansha, 7,62-mm kalibrli 67 jaýyngerlik patron jáne 5,45-mm kalibrli 3 jaýyngerlik patron tárkilendi. Sondai-aq, tártipsizdikter kezinde Almaty oblysynyń «Aport« Saýda ortalyǵynan urlanǵan 23 dana «Aifon 11-PRO« jáne 3 dana «Samsýng A-25« markaly jańa uialy telefondar tárkilendi. Barlyq qozǵalǵan qylmystyq ister boiynsha jappai tártipsizdikterdiń 52 qatysýshysy ýaqytsha ustaý izoliatoryna qamaldy», - dedi Shymkent qalasy politsiia departamentiniń bastyǵy, general maior Eraly Jumahanbetov.
Qalada jappai tártipsizdik oryn alǵannan beri politsiiaǵa 2716 adam jetkizilgen. 177 azamat ákimshilik jaýapkershilikke tartylsa, olardyń 175-i 15 táýlikke qamalyp, 2 adamǵa aiyppul salynǵan.
Qazirgi tańda Shymkent qalasynda jaǵdai turaqty. Qalanyń tynys-tirshiligin qalpyna keltirý maqsatynda politsiianyń qarýly kúzetiniń súiemeldeýimen «Halyq», «Jýsan», «Kaspi» bankteriniń bankomattary toltyrylýda.
Politsiia departamentiniń áskeri bólimderi Tótenshe jaǵdailar jónindegi departamenttiń kúshterimen birlesip kúsheitilgen rejimde jumys isteýde. Qala shekarasynda buǵattaý beketteri qoiylyp, komendanttyq saǵat ornatyldy. Strategiialyq nysandardy kúzetý kúsheitilgen.
