Shymkentte «Kók týdyń jelbiregeni» atty patriottyq aktsiia qorytyndylandy. Áleýmettik jelilerde qoldaý tapqan sharany belgili qoǵam belsendisi, jýrnalist Beisenkúl Narymbetova basshylyq etken «Serpilis» qoǵamdyq birlestigi uiymdastyrǵan bolatyn, dep habarlaidy "Ult aqparat".
Osymen ekinshi jyl uiymdastyrylyp kele jatqan aktsiia qala turǵyndarynyń memlekettik rámiz arqyly patriottyq sezimin asqaqtatyp, jurtshylyq arasynda úlken qoldaýǵa ie boldy. Biyl aktsiianyń aýqymy keńeiip, Qaraǵandy, Pavlodar, Taraz, Qyzylorda sekildi elimizdiń ózge óńir turǵyndary Kók bairaqpen sýretke túsip, aktsiiaǵa ún qosty, áleýmettik jelilerde chellendj uiymdastyrdy.
Aktsiianyń qorytyndysyna orai Shymkent qalasyndaǵy Jastar resýrstyq ortalyǵynda «Táýelsizdikpen dialog» marapattaý rásimi ótti. Atalǵan sharada sóz alǵan qalalyq Ishki saiasat jáne Jastar isteri jónindegi basqarmanyń basshysy Janar Bektaeva barshany Táýelsizdik merekesimen quttyqtap, izgi tilegin joldady. Al, aktsiiaǵa qatysýshylarǵa Memlekettik týymyz tartý etildi. Kók týdy syiǵa alǵan alǵashqy ujymnyń biri - Shymkent qalasy Ishki saiasat jáne Jastar isteri jónindegi basqarmasy «Rýhani jańǵyrý» bólimi boldy. Ujym «Kók týdyń jelbiregeni» aktsiiasyn «Ulttyq úrdiste kiineiik» chellendjimen úndestirdi. Shara barysynda Baqtiiar Taijan, Áset Ássandi, Abai Qalshabek, Erbol Dairashev bastaǵan aǵa býyn ókilderi jastarǵa Týdy tabystady. Jastar syiǵa alǵan kók bairaqty búgin qalamyzdaǵy kópqabatty úilerdiń qasbetine iletin boldy.
