Búgin oblys ákimi Janseiit Túimebaev qaladaǵy balalar men jasóspirimderge arnalǵan el aýmaǵyndaǵy halyqaralyq talaptarǵa sai keletin alǵashqy boks mektebiniń ashylý saltanatyna qatysty.
Endi №5-shi sport mektebi álemdik keńistiktegi sporttyq sharalardy qabyldaý múmkindigine qol jetkizdi. Buǵan deiin el aýmaǵynda mundai múmkindikke Astana jáne Almaty qalalary ǵana ie bolyp kelgen edi, dep habarlaidy óńir basshysynyń baspasóz qyzmeti.
Búgingi paidalanýǵa berilip otyrǵan boks mektebi ońtústik óńiri jas boksshylarynyń tyńǵylyqty daiyndalýyna arnalǵan basty sporttyq baza bolyp tabylatynyn aitqan óńir basshysy keshen el aýmaǵyndaǵy halyqaralyq talaptarǵa sai alǵashqy boks mektebi ekenin atap ótti.
«Sport pen dene shynyqtyrý - qashanda memlekettik máni zor áleýmettik sala bolyp tabylady. Elbasymyz deni saý, oiy sergek halyq qana álemdik básekege qabiletti bolatynyn san márte aityp keledi. Bul rette Prezidentimiz 2020 jylǵa deiin qazaqstandyqtardyń 30 paiyzyn buqaralyq sportqa tartýdy tapsyrǵan bolatyn. Urpaǵymyzdyń rýhy biik, densaýlyǵy myqty bolýy úshin buqaralyq sportty barynsha keń nasihattap, jastardyń sportpen shuǵyldanýyna ózimiz bastamashy bolǵanymyz durys», - dedi J.Túimebaev.
Jańa ǵimaratta sportshylardyń bokstyń ádis-tásilderine mashyqtanýy úshin tolyq jaǵdai jasalǵan. Nysanda sońǵy úlgidegi zamanaýi oqý synyptary, jattyǵý bólmeleri, janǵa jaily qonaqúi, meditsina kabineti, monsha, arnaiy kásipqoi boks kesheni jáne 220 kórermenge laiyqtalǵan arenasy bar.
Sonymen qatar, munda jas óskinderdiń biliktilik qabiletin arttyrý maqsatynda Olimpiada oiyndarynyń jeńimpazdary men ulttyq qurama múshelerinen dáris alýyna jaǵdai jasalǵan. Bul sport mektebinde qazirgi tańda 700-ge taiaý tálimger jattyǵýda.
