Shymkentte 16 tótenshe jaǵdai qyzmetkeri koronavirýs juqtyrǵany anyqtaldy. Bul týraly qala ákimi Murat Áitenov Instagram paraqshasynda jariia etti, dep habarlaidy "Ult aqparat".
«Ókinishke qarai, barlyq qabyldanǵan sharalarǵa qaramastan, KVI diagnozy rastalǵan shymkenttikterdiń sany artyp keledi. 21 sáýir saǵat 12:30-daǵy jaǵdai boiynsha qalamyzda atalǵan indetti juqtyrǵandar sany 103 adamǵa jetti. Belgili bolǵany, keshe anyqtalǵan 23 naýqastyń 16-sy - tótenshe jaǵdai qyzmetiniń ókili. Naýqastarmen bailanysta bolǵan adamdardyń barlyǵy anyqtalyp, karantinge jatqyzyldy. Bul degenimiz - virýsty infektsiiany juqtyrý qaýpi joǵary topqa dárigerler, politseiler men áskeri qyzmetkerlerden bólek qutqarýshylar da enip otyrǵanyn kórsetedi. Soǵan qaramastan qalanyń barlyq órt sóndirý bólimderi, sonyń ishinde 101 jáne 112 qyzmetindegiler shtattyq rejimde jumys isteýde» delingen habarlamada.
Qala ákimi sondai-aq, turǵyndardy asa qajettilik bolmasa úilerinen orynsyz shyqpaýǵa shaqyrǵan.
«Sebebi, virýstyń tasymaldaýshysy nemese indetti juqtyrǵan naýqaspen bailanysta bolǵan adammen betpe-bet kezdesip nemese kezdespegenińizdi búgin boljaý múmkin emes. Óz týystaryńyz ben jaqyndaryńyzdyń densaýlyǵy úshin ózin-ózi oqshaýlaýdyń qatań rejimin saqtańyz. Ózińizge qymbat jandardyń ómirin qaýipke tikpeńiz» delingen ákimniń paraqshasynda.
