Shymkentte nátijeli jumyspen qamtý jáne jappai kásipkerlikti damytýdyń 2017-2021 jyldarǵa arnalǵan baǵdarlamasyn iske asyrý jóninde túsindirý jáne ony júzege asyrý jóninde keńes ótti. Jergilikti kásipkerlerdiń basyn qosqan jiynǵa «Atameken» Kásipkerler palatasynyń basshylyǵy men ekinshi deńgeili bankterdiń ókilderi, sondai-aq «Yrys» mikroqarjylyq uiymy jáne «Damý» qorynyń menedjerleri qatysty, dep habarlaidy Ult.kz tilishisi QazAqparat agenttigine silteme jasap.
Shaǵyn jáne orta biznesti qoldaýda mańyzdy sanalatyn baǵdarlama elimizde osy jyldyń 1 qańtarynan bastap júzege asyrylýda. Qarapaiym adamdardyń tómen paiyzben jeńildetilgen nesiege qol jetkizýin arttyrýdy kózdeitin baǵdarlama jiynda jan-jaqty túsindirildi.
Baǵdarlamanyń jańalyǵy sol, nesieler bar bolǵany alty paiyzben beriledi, ári barlyq salaǵa qarjy qarastyrylǵan. Mamandardyń sózinshe, nesieni kez kelgen azamat - biznesin bastaǵandar da, endi josparlaǵandar da, qala berdi jumyssyz júrgender de ala alady. Al, nesieni alý úshin turǵyndarǵa óńirdegi ekinshi deńgeili 6 bankke baryp, qujat rásimdeýi qajet. Kepildemege qoiatyn múlki bolmasa, «Damý» qory 85 paiyzǵa deiin kepildeme bere alady. Bul maqsatqa búginde oblysqa ekinshi baǵyty boiynsha 2 mlrd 476 mln 400 myń teńge aýdarymdar bólingen. Olardyń bári ekinshi deńgeili bankterge túsken. Qazirdiń ózinde osy qarajattar esebinen 8 jobaǵa 97 mln teńge berilip otyr. Taǵy 500 mln teńgeniń jobalaryna qarjy berý týraly sheshim qabyldanǵan. Al, nesieniń maksimaldy somasy - 8000 AEK nemese shamamen 18 million teńgeni quraidy. Kezdesýde ekinshi deńgeidegi bankter men «Damý» qorynyń ókilderi kreditteýdiń sharttary men tártibi týraly tolyq aqparat berdi jáne kepildik alý shemasyn kórsetti. Kásipkerler qyzyǵýshylyq týdyratyn suraqtarǵa jaýap aldy.
«Biz jyldyń sońyna deiin osy qarjylardyń bólinýi boiynsha saraptama júrgizemiz. Árbir bankke qarajat bólindi me, jyldyń sońyna deiin qansha jobalar qarjylandyryldy, basqa bankter nege qarjylandyra almai jatyr. Solardyń problemasyn qarap, keiin usynysty Astanaǵa, osy baǵdarlamany júrgizip jatqan ministrlikke jiberemiz», - deidi OQO «Atameken» Ulttyq kásipkerler palatasynyń direktory Asqar Ábýbákirov.
